Հայ-ամերիկյան տնտեսական հարաբերությունները նոր որակական մակարդակ ունեն. Արծվիկ Մինասյան

ՀՀ տնտեսական զարգացման և ներդրումների նախարար Արծվիկ Մինասյանի կարծիքով՝ Ռուսաստանի նկատմամբ ԱՄՆ-ի կիրառած պատժամիջոցները, անշուշտ, ազդեցություն կունենան Հայաստանի տնտեսության վրա: Այս մասին նա նշեց այսօր լրագրողների հետ զրույցում:

Նախարարի խոսքով՝ դեռ ամբողջական վերլուծություններ չկան այդ մասով: «Առաջիկայում, երբ ունենանք առավել լիարժեք պատկերացում, կներկայացնենք»,- ասաց Մինասյանը:

Ինչ վերաբերում է ԱՄՆ-ի հետ տնտեսական հարաբերություններին, նա հայտնեց, որ դրանք ներկայումս նոր որակական մակարդակ ունեն: 

«Մենք ջանքեր ենք գործադրում, որպեսզի ներդրումների փոխադարձ համաձայնագիր ունենանք ԱՄՆ-ի հետ, ինչն ամերիկյան կազմակերպությունների ներդրումներն ավելի խթանելու և առևտրաշրջանառության մասով նոր մեխանիզմներ գործադրելու հնարավորություն կտա: Մենք կարող ենք ակնկալել ներդրումներ մեր տնտեսության ճյուղային ոլորտների առնվազն 80 %-ում»,-ասաց նախարարը՝ հավելելով. «Առաջարկվում են շուրջ մեկ միլիարդ դոլարը գերազանցող ներդրումային ծրագրեր, որոնցից իրատեսական է 240 հազար դոլարի ներդրումներ ունենալ առաջիկա ժամանակահատվածում: Դրանց մի մասն արդեն իրականացվել է»: