Երևանում ակումբի մոտ իրանցիները վիճել են` օգտագործելով սուր ծակող գործիք, ապակյա տարա

ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում ձեռնարկված անհրաժեշտ քննչական և դատավարական այլ գործողությունների արդյունքում պարզվել են Փ.Բուզանդ փողոցում գործող ակումբի մոտ տեղի ունեցած խուլիգանության դեպքի հանգամանքները, մեղադրանք է առաջադրվել 2 անձի:

Նախնական քննության տվյալներով՝ 2018թ. ապրիլի 11-ին՝ ժամը 00:00-ի սահմաններում, ԻԻՀ քաղաքացին իր երեք ընկերների հետ այցելել է Երևան քաղաքի Փ.Բուզանդ փողոցում գործող ակումբ, որտեղ ժամը 01:30-ի սահմաններում առաջացել է վիճաբանություն՝ ակումբի անվտանգության աշխատակցի և հաճախորդի միջև։ Վիճաբանությունը շարունակվել է ակումբի մուտքի մոտ՝ վերածվելով քաշքշուկի, որի ժամանակ օգտագործվել է սուր կտրող-ծակող գործիք, ապակյա տարա։

Ձեռնարկված միջոցառումների արդյունքում պարզվել է միջադեպի մասնակիցների ինքնությունը, անհատականացվել նրանց գործողությունները։

Մեկ անձ ճանաչվել է տուժող, երկու անձ՝ ներգրավվել որպես մեղադրյալ. բոլորն էլ ԻԻՀ քաղաքացիներ են:

Քրեական գործով ձեռք բերված ապացույցների հիման վրա՝ ակումբի հաճախորդներից մեկին մեղադրանք է առաջադրվել կտրող-ծակող առարկայի գործադրմամբ խուլիգանություն կատարելու համար՝ ՀՀ քրեական օրենսգրքի 258-րդ հոդվածի 4-րդ մասով, իսկ նույն ակումբի անվտանգության աշխատակցին՝ որպես զենք օգտագործվող ապակյա տարայի գործադրմամբ խուլիգանություն կատարելու և ծանր մարմնական վնաս պատճառելու համար՝ ՀՀ քրեական օրենսգրքի 258-րդ հոդվածի 4-րդ մասով, ՀՀ քրեական օրենսգրքի 112-րդ հոդվածի 2-րդ մասի 9-րդ կետով:

2 մեղադրյալի մասով հայտարարվել է նախաքննության ավարտի մասին, և քրեական գործը՝ մեղադրական եզրակացությամբ, ուղարկվել նախաքննության նկատմամբ հսկողություն իրականացնող դատախազին: