Դուք իմ մտքերն ավելի լավ ձևակերպեցիք. Արարատ Միրզոյանը` Դավիթ Հարությունյանին

Առաջին փոխվարչապետ Արարատ Միրզոյանն, ի վերջո, ներկայացավ ԸՕ-ի շուրջ ԱԺ քննարկումներին: Փոխվարչապետն ասաց, որ այսուհետ մասնակցելու է ԱԺ ֆորմատով քննարկումներին, իսկ նախկինում չի մասնակցել, որովհետև այդ քննարկումները համընկել են կառավարության նիստերի հետ: 

Նա նշեց, որ կառավարությունը համաձայն է մեկ կոնսենսուսային փաստաթուղթ ԱԺ-ում քննարկելուն ու քվեարկության դնելուն: «Այնպես չէ, որ կառավարությունն ունի դիրքորոշում և փորձում է պարտադրել մյուս քաղաքական ուժերին: Պետք է միասին լավագույն լուծումը գտնենք, որից կշահեն բոլորը»,- ասաց Միրզոյանը:

ԱԺ ՀՅԴ խմբակցության ղեկավար Արմեն Ռուստամյանն առաջարկեց, որպեսզի մինչ այժմ քննարկված հարցերը զտվեն: «Առաջարկում եմ` մինչև հիմա քննարկված հարցերը զտել, այսինքն` որ խմբակցության առաջարկն ընդունելի է մեկ կամ երկու խմբակցությունների կողմից, շարունակենք դրա շուրջ քննարկումները, որ հարցը չունի աջակցություն, այլևս չքննարկվի»,- ասաց նա:

Դավիթ Հարությունյանը կարծիք հայտնեց, որ ամենակարևոր մեսիջները փոխվարչապետը ներկայացրել է: «Այն, որ իրենք համատեղ աշխատանքի կողմնակից են, կողմնակից են, որպեսզի լինի մեկ նախագիծ, արդեն լավ է: Իհարկե, որևէ մեկը չի կարող բացառել, որ չի հաջողվի հասնել կոնսենսուսի, բայց բոլորս լիահույս ենք, և մեր աշխատանքն էլ մինչ այս պահը հուշում է` կկարողանանք հասնել կոնսենսուսի»,- ասաց նա:

Հարությունյանը շնորհակալություն հայտնեց փոխվարչապետին որոշման համար, որովհետև նախորդ նիստից հետո իրենց մոտ տարակուսանք էր առաջացել: Նա ասաց, որ կարևորը` համաձայնություն կա, և որ կառավարության հանձնաժողովը կմասնակցի խորհրդարանական հանձնաժողովի աշխատանքներին:

Միրզոյանն արձագանքեց. «Դուք իմ մտքերն ավելի լավ ձևակերպեցիք»: