Երբեք որևէ մեկին թույլ չտաք ձեր հաղթանակն առնել ձեր ձեռքից. վարչապետը` սիսիանցիներին

Այսօր ՀՀ վարչապետ Նիկոլ Փաշինյանը աշխատանքային այցով գտնվում է Սյունիքի մարզում: Նա Սիսիանի հրապարակում հանդիպում է բնակիչների հետ: Իր խոսքում վարչապետը նշեց, որ քայլարշավի երթուղում Սյունիքը տեղ չէր գտել, ինչի համար իրեն մեղավոր էր զգում:

Վարչապետն այնուհետև խոսեց իր այցի նպատակներից: «Իմ այցի նպատակներից առաջինն այն է, որ ձեր առաջ պետք է արձանագրել, որ այն հաղթանակը, որը տեղի է ունեցել, ձեզանից յուրաքանչյուրինն է: Մեր խնդիրն է ձեր մեջ այդ հաղթանակածի զգացողությունը պաշտպանել ոչ թե մեկ ամիս, մեկ տարի, այլ այն լինի մշտական: Ուզում եմ ընդգծել, որ դուք եք լինելու ձեր հաղթանակի տերը: Երբեք որևէ մեկին թույլ չտաք ձեր հաղթանակը ձեր ձեռքից առնել, որովհետև դուք հաղթած ժողովուրդ եք և պետք է մնաք հաղթած ժողովուրդ»,- ասաց նա:

Փաշինյանն ընդգծեց, որ այցն ունի գործնական նպատակ` տեղում խնդիրներին ծանոթանալ, լսել, հասկանալ առաջնահերթությունները, քննարկել, փնտրել և գտնել լուծման ուղիները: Նա ասաց, որ հարցուպատասխանի միջոցով կլսի քաղաքացիներին: