Միասնական քննությունների առաջին փուլն ավարտվեց. 1125 աշխատանք անբավարար է գնահատվել

Միասնական քննությունների առաջին փուլն ավարտվել է: Yerkir.am-ի հետ զրույցում Գնահատման և թեստավորման կենտրոնի արտաքին համագործակցության բաժնի պետ Վարդան Պարսամյանը նշեց, որ, ընդհանուր առմամբ, Արցախն էլ ներառյալ, առաջին փուլով 4625 դիմորդ է քննություն հանձնել:

Նշենք, որ նախորդ տարի առաջին փուլով քննություն հանձնողների թիվը 9737-ն էր, որը նույնպես, 2016-ի համեմատությամբ, պակաս էր /շուրջ 1500-ով/:

Դիմորդների թվի նվազումը պայմանավորված է 12-ամյա կրթական համակարգին անցնելու հետ. տարիներ առաջ առաջին դասարանցիների ոչ ստանդարտ ընդունելություն եղավ, ինչի արդյունքում նրանց մի մասը դպրոցն ավարտեց 2017-ին, մյուսը՝ 2018-ին:

Վարդան Պարսամյանը տեղեկացրեց, որ այս տարի առաջին փուլով 20 է գնահատվել 327 աշխատանք, իսկ անբավարար՝ 1125 /11.5 տոկոսը/:

«1-2 հեռախոսից արտագրելու դեպք է գրանցվել, որից մեկն, օրինակ, Արմավիրում էր: Ինքս հետևում էի քննության ընթացքին, նկատեցի, և դուրս հանեցինք քննակենտրոնից դիմորդին: Ինչ վերաբերում է բողոքարկումներին, ապա 2 դեպք ունենք «Քիմիա», «Ֆիզիկա», «Կենսաբանություն» առարկաներից, որոնք ավելի շուտ խնդրանք են, ոչ թե բողոքարկում: Մնացած  բողոքարկումները բովանդակային չեն»,- ասաց Պարսամյանը:

Նա տեղեկացրեց նաև, որ  քննությունների երկրորդ փուլը տեղի կունենա հուլիսի 2-8-ը: