ԸՕ բարեփոխումների հանձնաժողովի նիստում երկու էական որոշում է կայացվել

Կառավարությունում վարչապետին առընթեր ընտրական օրենսգրքի բարեփոխումների հանձնաժողովի երկրորդ նիստից հետո հանձնաժողովի նախագահ Արարատ Միրզոյանն ու հանձնաժողովի քարտուղար Դանիել Իոաննիսյանը մամուլի ասուլիս են տվել:

Արարատ Միրզոյանը տեղեկացրեց, որ կայացվել է երկու էական որոշում: Հանձնաժողովը ամրագրել է, որ ընտրակարգըպետք է լինի 100 տոկոսանոց համամասնական և որոշում կայացվեց անցողիկ շեմի համար, ըստ այդմ, խորհրդարանական ընտրություններին անցողիկ շեմը որոշվեց իջեցնել 1 տոկոսով` կուսակցությունների և դաշինքի համար համապատասխանաբար`  4 և 6 տոկոս:

Փաստարկները, ըստ Միրզոյանի, հետևյալն էին, որ կոնկրետ հայաստանյան իրողությունների պայմաններում նպատակահարմար չէ ռեյտինգային ընտրակարգը պահպանելը: Եվ դա ապացուցեցին նախորդ խորհրդարանական ընտրությունները:

«Այս ընտրակարգը հնարավորություն է տալիս ընտրություն անելիս գնալ կուսակցությունից դեպի անհատը, այլ ոչ թե հակառակը: Այսինքն այս ընտրակարգով առավել քաղաքականացվում են ընտրությունները: Մեկ այլ լուրջ փաստարկ է կանանց քվոտայի հարցը, երբ հստակ սահմանվում է կանանց քվոտան 100 տոկոսանոց համամասնական ընտրակարգով»,- ասաց Արարատ Միրզոյանը: