Էջմիածնում բողոքի ցույցն ավարտվեց` «Մանվել հեռացիր», «Կարեն հեռացիր» վանկարկումներով

Քիչ առաջ Էջմիածնում ավարտվեց բողոքի ցույցը` Էջմիածնի քաղաքապետ Կարեն Գրիգորյանի հրաժարականի պահանջով: Հանրահավաքի ընթացքում բազմաթիվ ելույթներ հնչեցին, որ Կարեն Գրիգորյանը և նրա հայրը` ՀՀԿ ԱԺ պատգամավոր, ԵԿՄ նախագահ Մնավել Գրիգորյանը պետք է հեռանան քաղաքից: Ելույթ ունեցողները հայտարարեցին, որ հանրահավաքները շարունակվելու են, և որ վաղվանից պետք է դիմեն գործադուլների, դասադուլների:

Հանրահավաքից հետո բողոքի ցույցի մասնակիցները երթ անցկացրեցին Էջմիածնի կենտրոնական փողոցներով` վանկարկելով «Մանվել հեռացիր», «Կարեն հեռացիր»:

Նշենք, որ հանրահավաքին մասնակցում էր ծնունդով Էջմիածնից Արթուր Ասատրյանը, ով առավել հայտնի է Դոն Պիպո մականունով: Երբ Կարեն Գրիգորյանին հարցրել են, թե հնարավո՞ր է, որ հրաժարական ներկայացնի, նա պատասխանել էր, որ դա հնարավոր է մի դեպքում, եթե էջմիածինցիները ինքնաբուխ դուրս գան այդ պահանջով, այլ ոչ թե որոշ անձինք կազմակերպեն բողոքի ցույց իր դեմ: Կարեն Գրիգորյանը  չէր նշել անուններ, չէր հստակեցրել, թե ում նկատի ունի:

Եվ ահա, շրջանառվեցին լուրեր, որ բողոքի ցույցը կազմակերպվել ու ֆինանսավորվել է Դոն Պիպոյի կողմից: Մինչդեռ լրագրողների հետ զրույցում Դոն Պիպոն հերքել էր այդ տեղեկությունները, ասելով, որ ինքը ցույցին մասնակցել է որպես քաղաքացի, իսկ կազմակերպման հետ որևէ առնչություն չունի:

Ուշագրավ է, եր հարթակից ելույթ ունեցողներից մեկը` երգչուհի Արմինե Գրիգորյանը հայտարարեց. «Փառք ու պատիվ այս հրաշք տղային, այս հրաշք մարդուն` Արթուր Ասատրյանին, որ բոլորիդ համախմբել է այստեղ»: