Մարզպետերի կազմն ամբողջությամբ կփոխվի. Նիկոլ Փաշինյան

Այսօր կառավարության անդամների երդմնակալության արարողությունից հետո վարչապետ Նիկոլ Փաշինյանը պատասխանեց լրագրողների հարցերին: Հարցին, թե ի՞նչ է հետևելու ԱԱԾ պետի այն հայտարարությանը, թե ապօրինի հարստացած մարդիկ գումարները կվերադարձնեն պետությանը, Փաշինյանը նախ նշեց, որ ԱԱԾ-ն և մյուս մարմինները լիարժեք պետք է կատարեն իրենց գործառույթները: Իսկ  եթե կա պետությանը հասցված վնաս, ապա իրենց  խնդիրը այդ վնասը վերականգնելն է։

«Մեր քաղաքական դիրքորոշումը այն է, որ մենք գիլյոտիններ չենք պատրաստվում շարել Երեւան քաղաքում։ Ամեն գործի ելք կապված է գործի հանգամանքներից»,- ասաց Փաշինյանը:

Հարցին, թե ինչ ճակատագիր է սպասվում մարզպետներին ու քաղաքապետերին, Փաշինյանը նշեց, որ մարզպետների կազմն ամբողջությամբ կփոխվի։ Մնացած պաշտոնների մասով ամեն ինչ կդիտարկվի օրենքի շրջանակներում:

Ինչ վերաբերում է ընտրական օրենսգրքի փոփոխություններին, վարչապետը նշեց. «Հույս ունեմ, որ մինչեւ հունիսի վերջ նախագիծը պատրաստ կլինի։ Կփորձենք հնարավորինս արագ, բայց անշտապ, որ ափալ-թափալ չլինի»: