Եվս մեկ տնօրեն ազատման դիմում է ներկայացրել. աշակերտները դասադուլ էին արել

Արմավիրի մարզի Բաղրամյան գյուղի միջնակարգ դպրոցում աշակերտները և ծնողները բողոքի ակցիա են իրականացրել՝ պահանջելով դպրոցի տնօրեն Շուշանիկ  Ոսկանյանի հրաժարականը: Նրանք ասում են, որ դպրոցում մի շարք անօրինականություններ են տեղի ունեցել՝ դրամահավաքությունից մինչև երեխայի հետ վատ վարվել:

Yerkir.am-ի հետ զրույցում համայնքի ղեկավար Գոռ Միրզոյանը տեղեկացրեց, որ տնօրենը որոշում է կայացրել ազատման դիմում գրել: «Սա ծնողների, համագյուղացիների բողոքն է, ու չնայած տնօրենը չի ընդունում մեղադրանքները, սակայն որոշել է համայնքի ցանկությանն ընդառաջ գնալ»,- ասաց նա:

Արմավիրի մարզի կրթության, մշակույթի և սպորտի վարչության պետ Գայանե Սայադյանն էլ մեզ հետ զրույցում նշեց, որ թե' տնօրենը, թե' ուսուցիչները զարմացած են: «Մինչ այս որևէ բողոք չի եղել, դրամահավաքության որևէ դեպք չենք ունեցել: Ես չգիտեմ՝ ինչով է պայմանավորված այս ամենը, մենք էլ ենք անակնկալի եկել: Անօրինականությունների հետ կապված՝ երբեք բողոք չի եղել, գուցե լռել են, հիմա են ասում, դեռ ոչինչ պարզ չէ»,- ասաց նա:

Սայադյանը նշեց նաև, որ շուտով հանդիպելու է դպրոցի տնօրենի հետ: