ՀՀԿ-ն վարչապետի թեկնածու չի առաջադրելու. Շարմազանով

Իշխող Հանրապետական կուսակցության խոսնակ Էդուարդ Շարմազանովը քիչ առաջ հայտարարեց, որ իրենց կուսակցությունը չի պատրաստվում վարչապետի թեկնածու առաջադրել մայիսի 1-ին կայանալիք ընտրություններին։ Այդ որոշումն ընդունվել է ՀՀԿ խմբակցության պատգամավորների և Սերժ Սարգսյանի միջև հանդիպման ժամանակ: Օրակարգում եղել է մեկ հարց` ՀՀ ներքաղաքական իրավիճակը և ՀՀԿ-ի մասնակցությունը վարչապետի ընտրությանը:

«Մեզ համար առաջնայինը հայրենիքի, պետության շահն է, Արցախի ու Հայաստանի անվտանգության հարցը: Առաջնորդվելով այդ առաջնահերթություններով, ՀՀԿ-ն որոշել է վարչապետի թեկնածու չառաջադրել: ՀՀԿ-ն կքննարկի բոլոր թեկնածուների հարցը, նրանց ներկայացրած ծրագրերը և միասնական որոշում կկայացնի»,- հայտարարեց Էդուարդ Շարմազանովը։ 

Նրա խոսքով` այսօր իրավիճակ է փոխվել Հայաստանում, կա ներքաղաքական ճգնաժամ, և առաջնայինը ՀՀԿ-ի համար պետության շահն է, այլ ոչ` կուսակցամոլությունը:Ըստ Շարմազանովի, դա լավ գիտակցված որոշում է:

«Թեկնածու չառաջադրելով, մենք խուսափում ենք առճակատումից, զոռբայությունից, անկայունությունից, սա էր ճիշտ ճանապարհը»,- ասաց նա:

Հիշեցնենք, որ խորհրդարանը մայիսի 1-ին հատուկ նիստում նոր վարչապետ է ընտրելու:Սպասվում է նաև ԲՀԿ առաջնորդ Գագիկ Ծառուկյանի հայտարարությունը: