Մեր որոշման հիմքում լինելու է ՀՀ անվտանգությունն ու ներքին կայունությունը. Էդուարդ Շարմազանով

ԱԺ ՀՀԿ խմբակցությունը դեռ որոշում չի կայացրել վարչապետի թեկնածու առաջադրելու հարցում:

ԱԺ փոխնախագահ, ՀՀԿ մամուլի խոսնակ Էդուարդ Շարմազանովը Yerkir.am-ի հետ զրույցում նշեց, որ մինչև ապրիլի 30-ի ժամը 18:00-ն ԱԺ խմբակցություններն ունեն ժամանակ` ներկայացնելու իրենց որոշումը վարչապետի ընտրության վերաբերյալ: «Մինչ այդ ժամկետը ՀՀԿ խմբակցությունը կներկայացնի իր որոշումը վարչապետի ընտրության վերաբերյալ»,- ասաց նա:

Անդրադառնալով ՀՀԿ-ական պատգամավոր Կարեն Կարապետյանի այն հայտարարությանը, թե ստեղծված իրավիճակում ճիշտ կլինի, որ ՀՀԿ-ն թեկնածու չառաջադրի, Շարմազանովն ասաց. «Կարեն Կարապետյանը, Գևորգ Կոստանյանը, տարբեր մարդիկ տարբեր կարծիքներ են արտահայտում, դա այդ մարդկանց անձնական կարծիքն է»:

Նա ընդգծեց, որ ՀՀԿ-ն ժողովրդավարական կուսակցություն է, իսկ բազմակարծություն միշտ եղել է, կա ու կլինի: «Մեզ մոտ որոշումների հանգում են տարբեր կարծիքներ քննարկելու արդյունքում, բոլոր կարծիքները կքննարկենք, կգանք միասնական որոշման: Մեր որոշումը լինելու է  միասնական, իսկ հիմքում լինելու է ՀՀ անվտանգությունը, պետական շահն ու ներքին կայությունը»,- եզրափակեց Շարմազանովը:

Հիշեցնենք, որ մայիսի 1-ին հրավիրված ԱԺ հատուկ նիստում քննարկվելու է վարչապետի ընտրության հարցը: Առայժմ կա մեկ թեկնածու` «Ելք» խմբակցության ղեկավար Նիկոլ Փաշինյանը: