Կրեմլը հույս ունի, որ Հայաստանում կհաջողվի հասնել քաղաքական կոնսենսուսի

Կրեմլը  գոհ է, որ Հայաստանում իրավիճակն ապակայունացման ճանապարհով չի գնում, և հույս ունի, որ կայունությունը կպահպանվի, ու կհաջողվի հասնել քաղաքական կոնսենսուսի: Այդ մասին լրագրողներին ասել է ՌԴ նախագահի մամուլի քարտուղար Դմիտրի Պեսկովը. հայտնում է ТАСС-ը:

Միևնույն ժամանակ, նա նշել է, որ այն ամենը, ինչ կատարվում է Երևանում, դա երկրի ներքին գործն է:

Պեսկովը նշում է, որ Հայաստանում և Ուկրաինայում կատարված իրադարձություններն անտեղին է համեմատել: «Ես զուգահեռներ չէի անցկացնի, քանի որ իրավիճակները լիովին տարբեր են»,- ասել է նա:

Պեսկովի խոսքով` իհարկե, իրավիճակը հարկավոր է վերլուծել, և ՌԴ-ում դրան ուշադիր հետևում են:

ՌԴ նախագահի մամուլի խոսնակը նաև նշել է, որ Վլադիմիր Պուտինը դեռ հեռախոսազրույցներ չի ունեցել ո'չ հրաժարական տված Սերժ Սարգսյանի, ո'չ էլ վարչապետի ժամանակավոր պաշտոնակատար Կարեն Կարապետյանի հետ: