Հանձնարարական մարզերում շինարարության ակտիվացման և գլխավոր հատակագծերի մշակման վերաբերյալ

Այսօր կառավարության նիստում վարչապետ Կարեն Կարապետյանը հանձնարարական տվեց մարզերում շինարարության ակտիվացման և գլխավոր հատակագծերի մշակման վերաբերյալ: Վարչապետի խոսքով` շինարարության ակտիվության գնահատման չափանիշներից է շինարարության թույլտվությունների տրամադրումը: 2017-ին 1003-ով ավելի թույլտվություն է տրվել` 2016-ի համեմատությամբ: Սակայն, չնայած դրական դինամիկային, պետք է արձանագրել, որ համայնքների և բնակավայրերի գլխավոր հատակագծերի գոտեվորման նախագծերի բացակայությունը խոչընդոտ է մարզերում շինարարական աշխատանքների նախաձեռնման, հատկապես կանխատեսելիության տեսանկյունից:

Վարչապետը հանձնարարեց տարածքային կառավարման և զարգացման նախարարին, քաղաքաշինության պետական կոմիտեի նախագահին, մարզպետերին` մեկամսյա ժամկետում մշակել համայնքների ղեկավարների կողմից շինարարության թույլտվությունների տրամադրման միասնական նորմատիվային մոտեցումներ: