Սննդի կետում պայթյունից տուժած 8-ամյա աղջկա մոտ ապաքինման դրական դինամիկա կա

Ապրիլի 2-ին Հյուսիսային պողոտայում գտնվող «Բուրգեր Քինգ»-ում տեղի ունեցած պայթյունից  տուժածներից այս պահին «Սուրբ Գրիգոր Լուսավորիչ» բժշկական կենտրոնում բուժում են ստանում երկուսը:

Yerkir.am-ի հետ զրույցում բուժկենտրոնի տնօրենի տեղակալ Գագիկ Մանուկյանը նշեց, որ այս պահին բուժվում են քույր և եղբայր՝ 6-ամյա Ռուդոլֆ Մարկոսյանը և 8-ամյա Ռուբինա Մարկոսյանը: «Եղբոր վիճակը լավ է, տղան գրեթե ապաքինվել է: Աղջնակի մոտ էլ դրական դինամիկա կա, և հետվիրահատական շրջանն անցնում է առանց որևէ բարդության»,- ասաց նա:

Մանուկյանը տեղեկացրեց նաև, որ երեկ հիվանդանոցից դուրս են գրվել ՌԴ 3 քաղաքացիները: Նրանց դեպի օդանավակայան ուղեկցել է ՌԴ հյուպատոսության ավտոմեքենան: Նրանք Մոսկվա հասնելուն պես կապ են հաստատել բուժկենտրոնի բժիշկների հետ ու տեղեկացրել, որ հասել են, ամեն ինչ նորմալ է: