Սննդի կետում պայթյունից տուժած 8-ամյա աղջկա ոտքերը վիրահատել են

«Բուրգեր Քինգում» երեկ երեկոյան տեղի ունեցած պայթյունից տուժած 8-ամյա Ռուբինա Մարկոսյանին վիրահատել են: Լրագրողների հետ զրույցում «Սբ Գրիգոր Լուսավորիչ» բժշկական կենտրոնի վերակենդանացման բաժանմունքի վարիչ Սամվել Կարապետյանը հայտնեց, որ վիրահատությունը տևել է 2.5 ժամ և բարեհաջող է անցել:

«Աղջկա երկու ոտքերն ենք վիրահատել: Խորը վերքեր ուներ: Վիրահատությունը հաջող է անցել, քայլելու խնդիր չի առաջանա աղջկա մոտ: Այժմ նրա վիճակը միջին ծանրության է»,- ասաց նա:

Կարապետյանը տեղեկացրեց, որ մյուսները թեթև վնասվածքներ են ստացել՝ քերծվածքի, բացվածքների, սալջարդի տեսքով:

Նշենք, որ այսօր առավոտյան հիվանդանոցից դուրս է գրվել Իրանի քաղաքացին՝ Զեյնա Հուսեյնին: