Թմրամիջոցների կարիք ունեցող հիվանդների դեղատոմսերին այլևս կնիք չի դրվի. Սերգեյ Խաչատրյան

Դեղերը դեղատոմսերով գնելու վերաբերյալ խորհրդարանական լսումների ժամանակ առողջապահության փոխնախարար Սերգեյ Խաչատրյանը նշեց, որ թմրամիջոցների, հոգեմետ դեղերի դուրս գրման նշանակալի թեթևացում է տեղի ունեցել:

«Այն հիվանդները, որոնք իրենց կյանքի ընթացքում ձեռք են բերել հիվանդություն և ցավային սինդրոմ, որը չի կարող բուժվել և պակասեցվել սովորական դեղերի միջոցով, կարիք ունեն թմրամիջոցների: Նախկին կարգը պահանջում էր մոտ 3-4 կնիք և մի քանի ստորագրություններ, որ մի քանի օրում հիվանդը կամ նրա հարազատները կարողանային դեղը ստանալ: Հիմա այս արգելքները հանված են»,- ասաց նա:

Խաչատրյանը նշեց, որ իրենք համարում են, որ բժշկական ցուցումներով, նաև հիվանդի առողոջությունից ու ցավը հանգստացնելու պահանջից ելնելով, ցանկացած բժիշկ, ոչ միայն օնկոլոգները, ցանկացած բուժող բժիշկ կարող է նշանակել թմրամիջոցներ: «Սա շատ կարևոր հանգամանք է, մանավանդ, որ մենք ուզում ենք զարգացնել պալիատիվ օգնությունը ՀՀ-ում»,- շեշտեց նա:

Խաչատրյանը նաև տեղեկացրեց, որ նոր որոշմամբ՝ ոչ մի դեղատոմսի տակ չի պարտադրվում կնիքի առկայությունը: «Այսինքն՝ պարտադիր պահանջ` կնքել դեղատոմսերը, չենք դրել»,- ասաց նա: