Քաղաքապետարանից վարորդներին ուղարկվող տուգանքների գրությունները կնիք չունեն

ֆեյսբուքյան օգտատեր Աշոտ Սարգսյանն իր էջում գրառում է կատարել՝ տարակուսանք հայտնելով քաղաքապետարանից վարորդներին ուղարկվող տուգանքների գրությունների վերաբերյալ:

Գրառման մեջ ասված է. «Ուսումնասիրելով քաղաքապետարանից եկած գրությունները փարկինգի համար չվճարելու, ավելի ճիշտ՝ տուգանվելու վերաբերյալ, ինձ մի բան շատ հետաքրքրեց:Ինչու՞ գրությունների վրա չկան կնիքներ , որոնք փաստում են, որ այն ուղարկված է քաղաքապետարանից և որ գրությունները օրինական հիմք ունեն:

Դրանք թղթեր են, որոնց հիման վրա մարդիկ մուծում են 5000 դրամ : Իսկ գուցե մի հանցագործ քաղաքապետարանի բլանկը կեղծում է ու ուղարկում է քաղաքացիներին , ես էլ որպես քաղաքացի ո՞նց հիմք ընդունեմ հասարակ ստորագրություններով որոշումները և մուծումներ անեմ ինչ որ հաշվեհամարի վրա:

Կամ գուցե այդ տուգանքները օրինական ուժ չունե՞ն, օրինակ, երբ տուգանք է գալիս պետավտոտեսչությունից , որոշման վերջում, ստորագրության վրա, պարտադիր կնիք կա: Վստահ եմ՝ իրավաբանների մեծ մասը կփաստեն, որ առանց կնիքի փաստաթուղթը օրինական հիմք չի կարող հանդիսանալ:

Ըստ այդ թղթերի, ստացվում է , որ «Փարկինգ սիթին» ուղարկում է խախտման նկարները, որոնք ի դեպ, կնիք ունեն, որ նկարահանման համար այդ ՓԲԸ-ն պատասխանատու է, իսկ քաղաքապետարանը արդեն վարչական իրավախախտման հետ կապված մնացած ընթացքն է կազմակերպում և այդ 5000 դրամ վարչական իրավախատման հետ կապված որոշումները ուղարկում է հասցեատերերին առանց կնիքի:

Հիմա հարց է առաջանում՝ ուղղված թե քաղաքապետարանին, թե իրավաբաններին:Արդյո՞ք օրինական է վճարումներ կատարել առանց կնիքի փաստաթղթի հիման վրա»: