Ովքե՞ր են Լիբանանի պատգամավորական ընտրություններում առաջադրված դաշնակցական թեկնածուները

Տեղեկացրել ենք, որ Լիբանանի պատգամավորական ընտրություններում առաջադրվել են 4 դաշնակցական թեկնածուներ՝ Հակոբ Բագրատունի (ներկայումս ՀՅԴ Լիբանանի ԿԿ ներկայացուցիչ, պատգամավոր), Հակոբ Թերզյան, Սերժ Չուխատարյան և Ալեքսանդր Մաթոսյան: Ընտրություններում նրանց կարգախոսն է՝ «Միասնաբար՝ ամբողջ Լիբանանի համար»:

Հակոբ Բագրատունի

Ծնվել է 1956-ին, Բեյրութում: Սովորել է քաղաքական գիտություններ՝ Բեյրութի ամերիկյան և Լիբանանյան համալսարաններում:

1975-1980 թթ. աշխատել է «Ազդակ»-ում, ինչպես նաև է դաշնակցական աշխարհատարած մամուլի մեծ ընտանիքում: 1980-2000 թթ. եղել է Ազգային Սուրեն Խանամիրյան վարժարանի տնորեն, իսկ 2000-2005 թթ.՝ Ազգային Լևոն և Սոֆիա Հակոբյան քոլեջի տնորեն:

1986-2005 թթ. եղել է Համազգայինի Հայագիտական բարձրագույն հիմնարկի դասախոս:

1986-ից ի վեր մաս է կազմել ՀՅԴ Լիբանանի Կենտրոնական կոմիտեի իրարահաջորդ կազմերին: Նա աշխատել է նաև Միջին Արևելքի եկեղեցիների խորհրդի և Եկեղեցիների համաշխարհային խորհրդի տարբեր հանձնախմբերում:

2005-ին և 2009-ին ընտրվել է լիբանանյան խորհրդարանի անդամ` Մեթնի ընտրաշրջանում:

2015-ից ՀՅԴ Լիբանանի Կենտրոնական կոմիտեի ներկայացուցիչն է:

Հակոբ Մարտիրոս Համբարձում Թերզյան

Ծնվել է 1966-ին, Բեյրութում: «Համբի 1921» ընկերության գործադիր խորհրդի հիմնադիր-նախագահն է: Անդամակցում է ներդրումների «Արապ» միջազգային ընկերությանը:

2001-2014 թթ. եղել է Լիբանանի հայոց թեմի Ազգային առաջնորդարանի բնակարանային հանձնախմբի անդամ:

2012-2014 թթ. եղել է Ազգային վարչության անդամ:

Մարզական կյանքին իր մասնակցությունը ցուցաբերել է ՀՄԸՄ-ի (Հայ Մարմնակրթական Ընդհանուր Միություն ) միջոցով:  ՀՄԸՄ-ի Լիբանանի Շրջանային վարչության անդամ է:

 2007-2010 թթ. եղել է Լիբանանի պասկետբոլի ֆեդերացիայի գործադիր խորհրդի անդամ:

2010-ից մինչ օրս Բեյրութի քաղաքապետական խորհրդի անդամ է:

Սերժ Հակոբ Չուխատարյան

Ծնվել է 1976-ին, Բեյրությում:

Եղել է Ս. Գրիգոր Լուսավորիչ սկաուտական միության անդամ և ստանձնել զանազան պաշտոններ: Եղել է նաև Ս. Գրիգոր Լուսավորիչ- Ս. Եղիա աթոռանիստ եկեղեցու երիտասարդաց համախմբի անդամ, նաև անդամակցել է ՀԿՀՄ-ին:

Ավարտել է Սեն Ժոզեֆ համալսարանը՝ որպես իրավաբան: 1988-ից անդամակցում է Փաստաբանների սենդիքային: Տարիներ շարունակ եղել է Հայկական պատգամավորական բլոգի իրավաբանական հարցերով խորհրդատու:

15 տարի շարունակ ստանձնել է Հայ կաթողիկե պատրիարքարանը ներկայացող փաստաբանի պարտականությունը:

Անդամակցում է Հայ կաթողիկե պատրիարքարանի տնտեսական խորհրդին և Հայ կաթողիկե համայնքի կալվածային հանձնախմբի խորհրդին: Զմմառու Տիրամոր վանքի՝ կալվածների հարցով փաստաբան է:

Նա երկու շրջանով եղել է Բեյրութի քաղաքային խորհրդի անդամ և պարտականություն ստանձնել խորհրդի իրավական հարցերով հանձնախմբում:

Ալեքսանդր Աբրահամ Մաթոսյան

Ծնվել է 1969-ին, Բեյրութում:

«Ալ Մաշրեք» ապահովագրական և վերաապահովագրական ընկերության նախագահն է:

Ղեկավարում է Եգիպտոսում նոր հաստատված «Միացյալ ապահովագրական ընկերություն» կազմակերպությունը: Լիբանանյան ապահովագրական ընկերությունների խորհրդի անդամ է:

ՀՅԴ Լիբանանի Կենտրոնական կոմիտեի տնտեսական հանձնախմբի անդամ է: