Թուրքիայի ԶՈւ-ն հայտարարել է Աֆրինում իր կորուստների մասին

Սիրիական Աֆրին քաղաքում անցկացվող «Ձիթենու ճյուղ» ռազմական գործողության շրջանակում թուրքական ԶՈւ-ի և Թուրքիային աջակցող ուժերի կորուստները հասել են 168-ի: Ըստ Diken-ի՝ այդ մասին նշվել է ԶՈւ գլխավոր շտաբի տարածած հաղորդագրության մեջ:

Համաձայն դրա՝ Աֆրինում  մահացածներից 46-ը թուրքական ԶՈւ զինվորականներ են, 116-ը՝ ռազմական գործողության շրջանակում Թուրքիային աջակցող «Սիրիական ազատ բանակ» ընդդիմադիր խմբավորման զինյալներ:

Թուրքական կողմի տարածած հայտարարության համաձայն՝ Աֆրինում գործողությունների հետևանքով զոհվել է ընդամենը 6 քաղաքացիական անձ, այն էլ՝ քրդական խմբավորումների դիրքերից թուրքական Հաթայ նահանգի վրա նետված հրթիռների պատճառով: