Սումգայիթյան ջարդերի վերաբերյալ հայտարարությունը ԱԺ-ում կքննարկվի փետրվարի 28-ին

ՀՀ ԱԺ արտաքին հարաբերությունների մշտական հանձնաժողովի նիստի ժամանակ հանձնաժողովի նախագահ Արմեն Աշոտյանը հայտարարեց, որ բոլոր խմբակցությունները կողմ են «Սումգայիթյան ոճրագործությունների 30-րդ տարելիցի մասին» հայտարարություն ընդունել: Նրա խոսքով՝ թեև հայտարարության վերնագրում գրված է` Սումգայիթյան ոճրագործություններ,  դրանում ներառված են նաև Ադրբեջանի կողմից հայատյացության այլ դեպքեր։

«Այստեղ ներառված են նաև Բաքվում և Շուշիում եղած ջարդերն ու առ այսօր տեղի ունեցող իրադարձությունները։ Փաստերը վկայում են, որ Ադրբեջանում հակահայկական քաղաքականությունը պետական մակարդակի քաղաքականություն է, որն ուղեկցվում է միջազգային իրավունքների, հատկապես` հումանիտար իրավունքի խախտմամբ», - նշեց Աշոտյանը։

Ըստ նրա՝ այս հայտարարությունը նաև ուղղված է արտաքին լսարանին, այն նպատակ ունի լայն միջազգային հանրությանը իրազեկել՝ ակնկալելով, որ պատշաճ գնահատականի կարժանացնեն փաստարկված իրադարձությունները։

Աշոտյանը տեղեկացրեց, որ հայտարարությունը ԱԺ-ում կքննարկվի փետրվարի 28-ին՝ չորեքշաբթի, և հույս հայտնեց, որ ընթերցվելուց անմիջապես հետո ԱԺ-ն կընդունի հայտարարությունը։