Այստեղ այցելելուց հետո կյանքը երբեք նույնը չի մնում. TravelBlog-ի ֆիլմը՝ Արցախի մասին

«Լեռնային կիրճեր, հինավուրց վանքեր և գյուղեր, ժամանակակից քաղաքներ և զարմանալի մարդիկ. այս ամենը կարելի է տեսնել Արցախի Հանրապետության մասին նոր ֆիլմում»,- գրում է TravelBlog.lv-ն:

Լատվիայից հայտնի բլոգեր Ալեքսանդր Ալիմովը և Լիտվայից Ստանիսլավ Գորբունովը 2017-ի սեպտեմբերին այցելել էին Արցախ և նկարահանել ֆիլմ «դեռևս ոչ այդքան հայտնի» վայրի մասին:

«Ուղևորություն դեպի Լեռնային Ղարաբաղ» նախագծի թիմի անդամները մեկ շաբաթ են անցկացրել Արցախում, եղել ամենահեռավոր անկյուններում, շփվել ամենատարբեր մարդկանց հետ:

«Կյանքը երբեք նույնը չի մնում Արցախ այցելելուց հետո». այս խոսքերով է սկսվում ֆիլմը:

Ֆիլմի նպատակն է բացահայտել այդ հրաշալի վայրն աշխարհի համար և նրա հսկայական զբոսաշրջային պոտենցիալը:

«Չնայած բոլոր քաղաքական բարդություններին` այստեղ հազարամյակներ շարունակ հյուրընկալ ու պարզ մարդիկ են ապրում և ուրախությամբ են ընդունում բոլոր նրանց, ովքեր ցանկանում են այցելել այդ վայրերը: Ֆիլմում նշվում է, որ վերջին տարիներին շատ բան է արվել երկիրն ամբողջ աշխարհի համար գրավիչ դարձնելու նպատակով: Լավ ճանապարհներ են կառուցվել, տարբեր ճաշակի ու գնի հյուրանոցներ են բացվել, էքստրեմալ և ճանաչողական երթուղիներ են անցկացվել լեռներում»,-  գրել է Ալիմովն իր բլոգում:

Հեղինակների խոսքով՝ ֆիլմը հեշտ է նկարահանվել, քանի որ Արցախում հետաքրքիր ու գեղեցիկ վայրերի պակաս չկա: Ֆիլմում նաև առաձնահատուկ ուշադրություն է դարձվել արցախցիների սովորույթներին ու ավանդույթներին, ինչպես նաև համեղ խոհանոցին: