«Պատենտ հանրաքվե». Թուրքիայում ազգայնամոլների ղեկավարը հեգնել է քրդերի անցկացրած հանրաքվեն

Թուրքիայում «Ազգային շարժում» կուսակցության առաջնորդ Դևլեթ Բահչելին նույնպես արձագանքել է Իրաքյան Քուրդիստանում երեկ անցկացված անկախության հանրաքվեին:

Ըստ Demokrathaber-ի՝ նա, հավատարիմ մնալով այդ հարցում երկրի դիրքորոշմանը, հայտարարել է. «Սա արկած է, որն ավարտվելու է հիասթափությամբ»:

Բահչելին հեգնել է նաև Իրաքյան Քուրդիստանի ղեկավար Բարզանիին՝ նշելով, թե այս հանրաքվեն եղել է նրա մանկության երազանքը: «Սա Բարզանիի մանկության երազանքն է, բայց նա դեռ կտեսնի՝ այն ինչ մղձավանջի կվերածվի»,- ասել է նա:

Բահչելիի խոսքով՝ հանրաքվեի հարցում տարբեր երկրների զգուշացումները անտեսելով՝ հանրաքվե անցկացրած Իրաքյան Քուրդիստանի համար «մեկնարկել է շատ մութ ժամանակաշրջան»: «Պատենտ հանրաքվեն չունի ոչ մի դրույթ և դատապարտված է մնալու թղթի վրա»,- հայտարարել է թուրք ազգայնականը: