Որոշակի բնակության վայր չունեցող անձինք կհաշվառվեն բնակչության պետական ռեգիստրում

Կառավարության վաղվա նիստի չզեկուցվող հարցերի օրակարգում սոցիալական հարցերի նախարարությունը ներառել է կառավարության որոշման փոփոխություն, ըստ որի ընդունումը  բխում է  «Բնակչության պետական ռեգիստրի մասին» ՀՀ օրենքի 7-րդ հոդվածի 1-ին կետի պահանջներից և նպատակ ունի կարգավորել որոշակի բնակության վայր չունեցող անձի ժամանակավոր կացարանում (այսուհետ` կացարան) հաշվառման և կացարանում բնակվելու ժամանակահատվածում (90 օր) նրա գտնվելու վայրի մասին տեղեկատվություն ստանալու անհրաժեշտությունից:

Անօթևանի կարգավիճակով պայմանավորված կացարան դիմած քաղաքացիներից շատերը չունեն մշտական գրանցման վայր և անհրաժեշտության դեպքում (երբ քաղաքացուն փնտրում են հարազատները, կամ հետախուզվում է հանցագործություն կատարելու կասկածանքով և այլն) հնարավոր չի լինում հայտնաբերել քաղաքացուն: Բնակչության պետական ռեգիստրում հաշվառվելը հնարավորություն է ընձեռում տեղեկատվություն ստանալ անօթևան անձի գտնվելու վայրի մասին:

Որոշման նախագծի ընդունմամբ հնարավորություն կընձեռվի, անհրաժեշտության դեպքում, օրենքով սահմանված կարգով բնակչության պետական ռեգիստրից տեղեկություն ստանալ անօթևան անձի գտնվելու վայրի մասին:

Որոշման նախագծի կարգավորման առարկան կացարանում ժամանակավորապես բնակվող անձի ազատ տեղաշարժվելու, բնակության վայր ընտրելու և բնակչի՝ ըստ բնակության վայրի հաշվառվելու իրավունքի իրացման և նրա գտնվելու  վայրի մասին տեղեկատվություն ստանալու հետ կապված հարաբերություններն են:

Որոշման նախագծի ընդունման արդյունքում որոշակի բնակության վայր չունեցող՝ անօթևան մարդկանց ժամանակավոր կացարանում բնակվող անձինք կհաշվառվեն բնակչության պետական ռեգիստրում, ինչը հնարավորություն կընձեռի ստանալ անհրաժեշտ տեղեկատվություն վերջիններիս գտնվելու վայրի մասին: