Ջավախքցի Ադամին Վրաստանի իշխանությունները թույլ չեն տալիս վերադառնալ հայրենիք

Վրաստանի իշխանությունները ջավախքցի Ադամ Այվազյանին թույլ չեն տալիս վերադառնալ Վրաստան` հայտարարելով, որ նա վտանգ է համարվում Վրաստանի համար:

Yerkir.am-ի հետ զրույցում Ադամը պատմեց, որ երեք օր առաջ դուրս է եկել Վրաստանից և հիմա ցանկանում է վերադառնալ: «Երեք օր առաջ իմ հայրենիք Վրաստանից դուրս եմ եկել, ցանկանում եմ վերադառնալ, բայց սահմանին ինձ հայտնեցին, որ չեմ կարող մուտք գործել Վրաստան, քանի որ վտանգ եմ համարվում պետության համար»,- պատմեց նա:

Ադամը պնդում է, որ ոչ մի հակապետական քայլ չի արել, ի դեպ, սահմանին իրեն այդպիսի պատասխան են տվել: Այժմ ընտանիքն էլ է եկել, գտնվում են Երևանում:  «Դիմել եմ դեսպանատուն, որտեղ ինձ ասել են` արտաքին գործերի նախարարություն դիմում գրեք, գուցե ձեզ պատասխանեն: Գնացել եմ Սփյուռքի նախարարություն, ներկայացրել իրավիճակը, ինձ պատասխանել են` մի բան կանենք, բայց ես ժամանակ չունեմ»,- ասաց նա, ապա պնդեց, որ ինքը ոչ մի վատ բան չի արել:

«Ես մաքուր եմ, ոչ մի հիմք չկա դրա համար: Երևի նրա համար են արել, որ միշտ պայքարում եմ հայ-վրացական հարաբերությունները լավացնելու համար: Ես ՀՀ քաղաքացի եմ, Վրաստանի քաղաքացիություն  չունեմ,  3-4 անգամ դիմել եմ, որպեսզի ստանամ, բայց չեմ ստացել քաղաքացիություն»,- նշեց Ադամը:

Ըստ նրա` «Ջավախք» անունով ձյուդոյի դպրոց ունի և ցանկանում է հայ երեխաների մարզել, հնարավոր է, որ խանդով են նայել և մտածել`  պետք չէ, այդ պատճառով էլ այսպես է եղել:

Ադամը հայտնեց, որ այսօր իրեն զանգահարել է Վրաստանի պատգամավորներից մեկը և ասել, որ լրագրողներին չդիմի, կփորձեն երկու օրվա մեջ հարցը լուծել: