ԲՈՀ-ը 24 գիտական աշխատանք չի հաստատել. «առաջատարը» ԵՊՀ-ն ու ԳԱԱ-ն են

Բարձրագույն որակավորման հանձնաժողովից տեղեկանում ենք, որ այս տարի /օգոստոսի 9-ի դրությամբ/ արդեն իսկ 24 գիտական աշխատանք չի հաստատվել կամ վերադարձվել է մասնագիտական խորհուրդներ` կրկնական քննարկման:

Տարեսկզբից ամենաշատը Գիտությունների ազգային ակադեմիայի և ԵՊՀ ուսանողների աշխատանքներն են մերժվել` յուրաքանչյուր բուհից 8 գիտական աշխատանք է մերժվել, որոնց թվում կան նաև դոկտորական աշխատանքներ: Չհաստատված աշխատանքներ կան նաև Մանկավարժական համալսարանից` 4 աշխատանք, Սլավոնականից`  1 աշխատանք:

Ինչ վերաբերում է մասնագիտություններին, ապա ամենից առավել գրականության գծով գիտական աշխատանքներն են մերժվել` ակադեմիայից միայն 5 աշխատանք չի հաստատվել, 1 աշխատանք էլ` ԵՊՀ-ից: Գրականությունից բացի, «Տնտեսագիտություն» և «Մանկավարժություն» առարկաներից են մերժվել 3-ական աշխատանքներ` համապատասխանաբար` ԵՊՀ-ից և Մանկավարժական համալսարանից: Երկուական մերժված աշխատանքներ կան «Պատմություն» /ԳԱԱ/ և «Բժշկություն» /ԵրՊԲՀ/ առարկաներից և այլն:

Նշենք, որ տարիներ շարունակ Հայաստանում դոկտորների թիվը չի մեծանում՝ տարեկան շուրջ 40 հոգի է նման աստիճանի հասնում, ովքեր էլ զբաղվում են բուն գիտությամբ: