Արցախում մեկնարկել են ՀՅԴ ճամբարները

Աղբյուրը՝ «Ապառաժ»

Վերջին տարիներին Արցախի պատանիների ամառային հանգստի հաճելի ու անբաժանելի մասն են դարձել ՀՅ Դաշնակցության աշխարհասփյուռ կառույցների երիտասարդական միությունների կողմից Արցախի տարբեր շրջաններում կազմակերպվող բակային ճամբարները: Բացառություն չէ նաև այս տարին: Հուլիսի 10-ին Ստեփանակերտի Աշոտ Ղուլյանի անունը կրող դպրոցում մեկնարկել է 10-16 տարեկան պատանիների համար նախատեսված ճամբարը, որը նախաձեռնել է ՀՅԴ Արևմտյան շրջանի երիտասարդական միությունը: Ճամբարի ընդհանուր պատասխանատու Վահե Լեփեջյանն արդեն մի քանի  անգամ մասնակցել է Արցախում կազմակերպվող ճամբարներին, իսկ խմբի մնացած անդամներն շատ են եղել Հայաստանում և Արցախում, իսկ ճամբարների ծրագրով առաջին անգամ են  այստեղ:

Ըստ Վահե Լեփեջյանի ճամբարի կազմակերպումն ունի մի քանի նպատակներ: «Առաջին հերթին Սփյուռքում ապրող հայերի համար շատ լավ առիթ է, որպեսզի գալով այստեղ իրենց աչքով տեսնեն տարիների ընթացքում գրքերից հայրենիքի մասին սովորածները: Միաժամանակ այստեղի հայությունը պետք է իմանա, որ դրսի հայերը իրենց չեն մոռացել, միշտ մտածում են իրենց մասին և հնարավորը կանեն օգնելու համար: Նպատակներից մեկն էլ մարդկանց տեղեկացնելն է, որ Դաշնակցությունն իր ուժերը տրամարադրում է հայ ժողովրդին օգնելու համար»,- նշել է նա:

Ընդհանրապես ամեն ճամբար երկու շաբաթ է տևում՝ 10 օրվա ճամբարային և 4 օրվա հանգստի ծրագրով: Այդ ընթացքում նախատեսվում են հայոց պատմության, Դաշնակցության պատմության, հայրենասիրական երգերի ուսուցում, սպորտային խաղերի, մրցումների կազմակերպում: Նպատակն է բարելավել մարմնական և մտավոր ունակությունները, ամրապնդել հայրենիքի հետ կապը:

Ստեփանակերտի ճամբարի պատասխանատուն այս տարիների ընթացքում իրենց կատարած աշխատանքի արդյունքն այսօր տեսնում է .«Այսօր ծանոթացա մի պատանու հետ, ով 7 տարի մեր կազմակերպած ճամբարներին մասնակցել է և բոլոր վարիչներին, պատասխատուներին հիշում է: Եվ այսօր եկել է իր գիտելիքները մյուսներին փոխանցելու: Հույս ունեմ, որ կամաց-կամաց ժողովուրդն ավելի կմոտենա Դաշնակցությանը, կմիանան մեզ և մեզ հետ կօգնեն մնացածներին»:

«Մեզ համար մեծ բավականություն է հայրենի հողի վրա լինելը, այստեղ ավելի ուժեղ ենք զգում մեզ,- ասում է Վահեն ու ավելացնում, որ ամեն անգամ նորից է սիրահարվում այս հողին, այստեղ է տեսնում մեր ժողովրդի հզությունը: Այստեղ առաջին անգամ եկածները հոյակապ տպավորություն ունեն, որովհետև հակասական բաներ են լսել Արցախի մասին և բոլորը հաճելիորեն զարմացած էին՝ տեսնելով զարգացող քաղաքն ու մարդկանց բարի վերաբերմունքը:

Հուլիս ամսվա ընթացքում կմեկնարկեն բակային ճամբարներ նաև Շուշի և Մարտունի քաղաքներում՝ ԱՄՆ Արևմտյան շրջանի երիտասարդական միության և Լիբանանի Զավարյան Ուսանողական միության նախաձեռնությամբ: