Հանրությունը խանդավառված չէ այս տոնով. սահմանադրագետ

Այսօր ՀՀ-ում սահմանադրության օրն է: Սահմանադրական իրավունքի մասնագետ Վարդան Այվազյանն այսօր լրագրողներին ասաց, որ հանրությունն այնքան էլ խանդավառված չէ այս  տոնով: Եվ դա, ըստ նրա, պայմանավորված է մտածողությամբ, այլ ոչ թե սոցիալ-տնտեսական ծանր պայմաններով:

«Ընկերներս զանգում են, ասում՝ շնորհավոր տոնդ: Չեն գիտակցում, որ իմ տոնը չէ, այլ բոլորինս է: Սահմանադրության դերակատարությունը մեր կյանքում գիտակցված չէ»,- ասաց Այվազյանը և հույս հայտնեց, որ կգա ժամանակը, և մեր ժողովուրդը կգիտակցի այս օրվա նշանակությունը:

Նա նշեց, որ մեկուկես տարի է, որ մենք նոր կառավարման ձևի պայմաններում ենք ապրում, և ինչպես ժողովուրդը, հանրությունը, այնպես էլ իշխանությունները հույս են կապում, որ նոր` փոփոխված Սահմանադրությունը կարող է առաջընթացի հիմքեր ունենալ:

«Ընդհանրապես, սահմանադրություններն առաջարկում են իդեալականին մոտ մոդել, և ընդամենը հասարակությունն ու իշխանությունները պետք է մեկտեղեն ջանքերը, որպեսզի հասնեն դրան: Մենք էլ եթե ջանքեր չկիրառենք, որևէ արդյունքի չենք կարող հասնել, անհրաժեշտ է տքնաջան աշխատանք իրականացնել»,- ասաց սահմանադրագետը:

Ըստ նրա՝ սահմանադրական փոփոխություններն իրականացվում են երկու հիմքով՝ Սահմանադրության մեջ լրացումներ կատարելու և ուղղումներ կատարելու: Մեզ մոտ, Այվազյանի կարծիքով, երեք անգամ փոփոխություններ կատարվել են, որովհետև հարկ է եղել Սահմանադրության մեջ ուղղումներ մտցնել:

«Ե´վ մեր իշխանությունները, և´ մեր հանրությունը պետք է ջանքեր թափեն, հակառակ դեպքում` Սահմանադրության մեջ ամրագրված դրույթները կմնան որպես բառախաղ: Հասարակության գիտակցության առումով` պետք է համազգային ծրագիր լինի, սկսած դպրոցից, նախարարներից, պատգամավորներից` վերապատրաստման դասընթացներ պետք է լինեն:  Վերապատրաստման անհրաժեշտություն ունեն քաղաքական պաշտոն կրողները՝ նախարարները, պատգամավորները»,- ընդգծեց նա:

Վարդան Այվազյանն ուշադրություն հրավիրեց նաև անվտանգության խնդրին: «Հայոց բանակն ապահովում է մեր պետության ապահովման գործառնական հատվածը: Անվտանգությունը պետք է նաև հայեցակարգային առումով պետականության ճիշտ մոդել ամրագրի»,- ասաց նա: