Աղետները, արտակարգ իրավիճակները քաղաքական քարտեզ չեն հասկանում. ԱԻՆ

Կարո՞ղ են, արդյոք, անհրաժեշտության դեպքում Արցախի և Հայաստանի ԱԻՆ-ները հանդես գալ միասնաբար. ԱԺ-ում ՀՀԿ-ական պատգամավոր Միհրան Պողոսյանը հարց ուղղեց ԱԻՆ նախարար Դավիթ Տոնոյանին:

«Արցախն ու Հայաստանն աշխարհաաղետային նույն գոտում են գտնվում: Աղետները, արտակարգ իրավիճակները քաղաքական քարտեզ չեն հասկանում: Քանի որ քաղաքական սահմաններ Հայաստանի և Արցախի միջև չկան, մենք որպես միասնական համակարգ ենք գործում»,- պատասխանեց նախարարը:

Պատգամավորը նաև հետաքրքրվեց, թե ի՞նչ փուլում է վաղ ազդարարման համակարգերի արդիականացման հարցը: Նախարարն ընդգծեց, որ համակարգն այսօր արդիականացվում է շչակների տեղադրման, ինչպես նաև նորագույն տեխնոլոգիաների, այդ թվում` ռադիո- և հեռախոսակապի կիրառման միջոցով:

Դավիթ Տոնոյանը հավելեց, որ, մասնավորապես, սահմանային բնակավայրերում համակարգերի արդիականացումը ուշադրության կենտրոնում է: