Առաջնահերթ խնդիրներից է օժանդակել զարգացնել մարզային երիտասարդության ներուժը

ՀՀ սպորտի և երիտասարդության հարցերի նախարարի տեղակալ Արսեն Քարամյանը մասնակցել է հունիսի 2-ին  Երևանում կայացած Հայաստանում ԱՄՆ Խաղաղության կորպուսի գործունեության 25-ամյակի տոնակատարությանը և Խաղաղության կորպուսի 42 նոր կամավորների երդման արարողությանը:

Նախարարի տեղակալը հանդես է եկել ողջույնի խոսքով և նշել, որ ՀՀ սպորտի և երիտասարդության հարցերի նախարարությունը բարձր է գնահատում այս տարիների ընթացքում Խաղաղության կորպուսի երևանյան գրասենյակի կողմից Հայաստանի Հանրապետության բազմաթիվ համայնքներում իր կամավորների միջոցով իրականացրած և այսօր էլ իրականացվող երիտասարդական և համայնքային զարգացման, անգլերեն լեզվի ուսուցման ծրագրերը և իհարկե մարդկային և մասնագիտական մեծ նվիրումով իրականացվող աշխատանքը:

Ա. Քարամյանի խոսքով, ՀՀ սպորտի և երիտասարդության հարցերի նախարարության և Խաղաղության կորպուսի գործընկերությունը տարիների պատմություն ունի և այդ բազմամյա արդյունավետ համագործակցության հիմքը նախարարության և Խաղաղության կորպուսի միջև երիտասարդության զարգացման ոլորտում համատեղ աշխատելու և համագործակցելու նպատակով կնքված փոխըմբռնման հուշագրերն են:

«Մեր համագործակցության առաջնահերթ խնդիրներից է օժանդակել զարգացնել մարզային երիտասարդության ներուժը և այն օգտագործել ի նպաստ Հայաստանի Հանրապետության համայնքների  հզորացման: Մենք հատկապես կարևորում ենք այն հանգամանքը, որ հայաստանցի երիտասարդները Խաղաղության կորպուսի կամավորների օժանդակությամբ հնարավորություն են ստանում ակտիվորեն ներգրավվելու և՛ իրենց համայնքի, և՛ իրենց անհատական զարգացման ծրագրերում, սովորում են լինել ակտիվ և նախաձեռնող քաղաքացիներ, ինչպես նաև հայ-ամերիկյան բարեկամական կապերի հետագա ամրապնդման յուրօրինակ պատասխանատուներ»,- ասել է նախարարի տեղակալը:

 Միջոցառմանը ներկա են եղել Հայաստանի Հանրապետության և Ամերիկայի Միացյալ Նահանգների բազմաթիվ պաշտոնյաներ: