Ըմբշամարտի ֆեդերացիայի աշխատանքները համակարգելու է ՀԱՕԿ-ը

ՀՀ սպորտի և երիտասարդության հարցերի նախարար Հրաչյա Ռոստոմյանն այսօր հանդիպել է Հայաստանի Հանրապետության ըմբշամարտի ֆեդերացիայի անդամների հետ և քննարկել ֆեդերացիայի հետագա գործունեության ծրագրերը: Հայաստանի Հանրապետության ըմբշամարտի ֆեդերացիայի նախագահ Սամվել Կարապետյանի հրաժարականից հետո ֆեդերացիայի աշխատանքները համակարգելու է Հայաստանի ազգային օլիմպիական կոմիտեն: ՀԱՕԿ-ի նախագահ Գագիկ Ծառուկյանի ֆինանսական աջակցությունը հնարավորություն կտա պահպանելու ֆեդերացիայի բնականոն աշխատանքը՝ ապահովելով մեր մարզիկների ուսումնամարզական հավաքների անցկացումը, նրանց մասնակցությունը միջազգային մրցաշարերին, Եվրոպայի և աշխարհի առաջնություններին»,- ասել է նախարար Ռոստոմյանը:

 

Նրա խոսքերով՝ ըմբշամարտը մեր հենակետային մարզաձևերից է, և ՀՀ սպորտի և երիտասարդության հարցերի նախարարությունը Հայաստանի ազգային օլիմպիական կոմիտեի հետ համատեղ իրականացնում է քննարկումներ ինչպես հունա-հռոմեական, այնպես էլ ազատ ոճերի ըմբշամարտերի ազգային հավաքականների մարզիչների հետ: «Մենք իրավունք չունենք ուշադրությունից դուրս թողնել այս մարզաձևը, և այն մշտապես գտնվելու է սպորտի ոլորտի ղեկավարության տեսադաշտում: Վստահ եմ՝ հայ ըմբիշները մեզ դեռ կուրախացնեն ամենահեղինակավոր մրցագորգերում տարած հաղթանակներով և ամենաբարձր հարգի մեդալներով»,- նշել է Հրաչյա Ռոստոմյանը: