Էդ այլանդակն ինչ եկավ, էս քաղաքը խառնեց իրար. Վարդան Ղուկասյան

Գյումրիի նախկին քաղաքապետ, ԲՀԿ ցուցակով պատգամավոր ընտրված Վարդան Ղուկասյանը Yerkir.am-ի հետ զրույցում հերքեց մամուլում հրապարակված լուրերը, թե իր որդին գազալցակայանի աշխատակիցներին ծեծի է ենթարկել:

«Այդ ազգանուններն ու անունները որ գրել են, նրա համար են գրել, որ հավանական է` նրանք ինձ են պաշտպանել, դրա համար էդպես են ասում: Դրանք իմ հարազատներն են, իմ մոտիկներն են, մեր տան տղերքն են»,- ասաց նա, ապա հավելեց. «Ով որ դա գրել է տվել, թող ինքն իր ախրանի մասին մտածի, թե ինչեր են կատարվում քաղաքում: Էդ այլանդակն ինչ եկավ, էս քաղաքը խառնեց իրար»:

Մեր պնդող հարցին` Ձեր որդին ոչ ոքի ծեծի չի՞ ենթարկել, Ղուկասյանը պատասխանեց. «Դա հիմարություն է, դրան չենք էլ ուզում արձագանքել»:

Նշենք, որ «Ժողովուրդ» թերթը գրել էր, որ  օրերս Գյումրիում աղմկալի դեպք է եղել. Ղուկասյանի որդին՝ Սպարտակ Ղուկասյանը, մտել է իրենց պատկանող, բայց վարձավճարով տրված գազալցակայան եւ ծեծի ենթարկել աշխատակիցներին: