Երևանում մեկնարկել են «Թենիսի Հայկական սփյուռքի գավաթի» և Կիոկուշին կարատեի մրցաշարերը

Երևանում մեկնարկել է «Թենիսի Հայկական սփյուռքի գավաթի» մրցաշարը, որի 12-րդ առաջնության հանդիսավոր բացմանը ներկա են գտնվել Երևանի քաղաքապետ Տարոն Մարգարյանը, ՀՀ սպորտի և երիտասարդության հարցերի նախարար Հրաչյա Ռոստոմյանը և Մոսկվայում Երևանի քաղաքապետարանի ներկայացուցչության ղեկավար Մակար Նահապետյանը, ում նախաձեռնությամբ էլ անցկացվում է գավաթի մրցաշարը: 
Քաղաքապետ Տարոն Մարգարյանի աջակցությամբ արդեն երկրորդ անգամ Երևանում անցկացվող մրցաշարին մասնակցում են Ռուսաստանի, Հայաստանի և մի շարք այլ երկրների պրոֆեսիոնալ մարզիկներ, ինչպես նաև սիրողական թենիսով զբաղվողներ: 
40 մարզիկ՝ 20 զույգերով, մեծահասակների խմբում պայքարելու են հաղթական գավաթի համար:

 Երևանի քաղաքապետ Տարոն Մարգարյանը ներկա է գտնվել նաև Կիոկուշին կարատեի Երևանի առաջնության բացման հանդիսավոր արարողությանը: Առաջնությանն այս տարի մասնակցում է ֆեդերացիայի շուրջ 1000 մարզիկ, ինչը, պատասխանատուների խոսքով, աննախադեպ ցուցանիշ է: Հատկանշական է, որ ֆեդերացիայի պատանեկան հավաքականն այսօր է վերադարձել Վրաստանի մայրաքաղաք Թբիլիսիում կայացած Կովկասի ամենամյա առաջնությունից, որտեղ հայ մարզիկներից 9-ը զբաղեցրել են առաջին, 3-ը՝ երկրորդ և 7-ը՝ երրորդ հորիզոնականները: Հաղթանակով Երևան վերադարձած մարզիկներին քաղաքապետ Տարոն Մարգարյանը պարգևատրել է պատվոգրերով: Շնորհավորելով Կովկասի ամենամյա առաջնության հաղթողներին՝ քաղաքապետ Տարոն Մարգարյանը նաև հաջողություններ է մաղթել Կիոկուշին կարատեի Երևանի առաջնության մասնակիցներին:

Շնորհակալություն հայտնելով Երևանի քաղաքապետին ֆեդերացիայի բոլոր նախաձեռնությունների կյանքի կոչման հարցում ցուցաբերած մշտական աջակցության և հետևողականության համար՝ Կիոկուշին կարատեի ֆեդերացիայի նախագահ Անդրանիկ Հակոբյանը քաղաքապետ Տարոն Մարգարյանին է փոխանցել Կովկասի առաջնությունում Հայաստանի հավաքականին շնորհված հաղթական գավաթը: 
Նշենք նաև, որ Կիոկուշին կարատեի միջազգային ֆեդերացիան Հայաստանի Կիոկուշին կարատեի ֆեդերացիային շնորհել է պաշտոնական իրավունք՝ 2018թ. Եվրոպայի ամենամյա առաջնությունը Երևանում անցկացնելու համար:

Երևանի քաղաքապետարանի տեղեկատվության
և հասարակայնության հետ կապերի վարչություն