Շատ հեշտ է ասել՝ սա է մեղավոր, նա է մեղավոր. Ռուբեն Վարդանյան

Գործարար,  բարեգործ Ռուբեն Վարդանյանն այսօր Ծիծեռնակաբերդի հուշամալիրում, պատասխանելով լրագրողների հարցերին, նշեց, որ վստահ է մի բանում, որ մենք, որպես ազգ, միայն կարող ենք լինել հաջող և հաջողությամբ կարող ենք հաղթահարել մեր բոլոր դժվարությունները:

«Հաջողության համար մենք  պետք է միանանք` Սփյուռքը,  Հայաստանը միասին  պետք է գործ անեն, որ Հայաստանը դառնա չքնաղ երկիր: Մեր զարգացումով և մեր հաջողությամբ ցույց տանք բոլորին, մեր հարևաններին, որ իրենց ուզածը չի ստացվելու, որ մենք կյանքն ենք զարգացնում, մեր լուման դնում ենք աշխարհի զարգացման մեջ և անում ենք ամեն ինչ, որ աշխարհը հիշի` ինչ է եղել 102 տարի առաջ, նայելով մեզ` հասկանա, որ մենք երեք հազար տարվանից ավելի պատմություն ունենք, և մենք այն ազգն ենք, որ աշխարհին շատ բան է տալիս և տալու է»,- հայտարարեց նա:

Հարցին` ինչո՞ւ չի անդրադառնում մարդու իրավունքների պաշտպանությանը, ՀՀ-ում բաց չի՞ տեսնում այս ոլորտում, Վարդանյանն արձագանքեց. «Մեր «Ավրորա» մրցանակի շարժումը մարդու իրավունքների մասին չէ, մարդու արժեքների մասին է: Մենք ավելի լայն բանի մասին ենք խոսում. «Ավրորան» համաշխարհային համամարդկային արժեքների մասին է խոսում, որ այդ արժեքների վրա հիմնված երկիր պետք է ստեղծենք, դրա համար մեզ համար կարևոր է, որ այդ արժեքների մասին խոսենք, և այդ արժեքները բոլորի համար որպես ֆունդամենտ պետք է լինեն: Այդպես  կարող ենք փոխել կյանքը և' այստեղ, և' աշխարհում, ինչը արվում է»:

Ինչ վերաբերում է  հարցին` այստեղ տեսնո՞ւմ է հեռանկար, որ այս համակարգով փոփոխությունների հասնենք, Վարդանյանը նշեց, որ ինքը լավատես է: «Մենք 18 տարի առաջ սկսել ենք ծրագրեր` իմանալով, որ դա դժվար է, բայց այլ ճանապարհ չկա, շատ հեշտ է ասել, թե` սա է մեղավոր, նա է մեղավոր, բայց պետք է անենք, ուրիշ ճանապարհ չունենք»,- ասաց նա: