«Ճշմարտություն՝ չկա ուրիշ». Լիբանանում ՀՅԴ կոմիտեները ոգեկոչել են Ցեղասպանության 102-րդ տարելիցը

Աղբյուրը՝ Aztagdaily

Կազմակերպութեամբ ՀՅԴ «Սարդարապատ» եւ «Ռուբէն» կոմիտէներուն երէկ` ուրբաթ, 21 ապրիլին տեղի ունեցաւ Հայոց ցեղասպանութեան 102-ամեակի նշում:

Արդարեւ, երեկոյեան ժամը 8:00-ին, Պուրճ Համուտի Նահատակաց յուշակոթողին դիմաց տեղի ունեցաւ ծաղկեպսակներու զետեղում զոյգ կոմիտէութիւններուն կողմէ, որմէ ետք ներկաները ՀՄԸՄ-ի շեփորախումբին առաջնորդութեամբ  ուղղուեցան դէպի Նորաշէնի «Ռուբէն» ակումբ, որուն կից թաղին մէջ տեղի ունեցաւ ոգեկոչման ձեռնարկ:

Հայոց ցեղասպանութեան 102-ամեակին նուիրուած ձեռնարկը սկսաւ Լիբանանի եւ Հայաստանի քայլերգներուն ունկնդրութեամբ, որմէ ետք բարի գալուստի խօսքը արտասանեց «Ռուբէն» կոմիտէի անդամ Շանթ Սալպաշեան: Ան նախ եւ առաջ ներկաներէն խնդրեց մէկ վայրկեան յոտնկայս լռութեամբ յարգել Հայոց ցեղասպանութեան մէկուկէս միլիոն սուրբ նահատակներուն յիշատակը: Ապա ան նկատել տուաւ, որ Հայոց ցեղասպանութիւնը լոկ պատմական իրողութիւն մը չէ, այլ կը հանդիսանայ մեր դարաւոր պատմութեան ամէնէն արիւնալի էջերէն մէկը, որ անջնջելի պիտի մնայ մեր յիշողութենէն:

Սալպաշեան հաստատեց, որ թէեւ Ցեղասպանութիւնը ցնցեց հայ ժողովուրդը, սակայն չյաջողեցաւ վերացնել անոր գոյատեւելու կամքը` աւելցնելով, որ քանի մը տարի ետք հայութիւնը կերտեց կարճատեւ կեանք ունեցող անկախ հայրենիք, ապա հզօր սփիւռք, որ ջահակիրը հանդիսացաւ Հայ դատի հետապնդման աշխատանքներուն: «Այսօր մեր հայրենիքը դարձեալ անկախ է, բայց Հայ դատը տակաւին չէ գտած իր արդար լուծումը: Ցեղասպան թուրքը տակաւին կ՛ուրանայ իր գործած ոճիրը, եւ մեր պատմական տարածքները կը մնան իր կողմէ բռնագրաւուած: Անկախ Հայաստանի իրավիճակը, արտագաղթի հետզհետէ թափ ստացող երեւոյթը, երկրին տնտեսական ծանր պայմանները կը հանդիսանան նաեւ մեր ամէնօրեայ մտահոգութիւնները: Նոյնքան մտահոգիչ է նաեւ անկախ Արցախի կացութիւնը», ըսաւ Շանթ Սալպաշեան` աւելցնելով, որ ազրպէյճանցիին կողմէ զինադադարի յաճախակի խախտումն ու ոտնձգութիւնները կը խաթարեն Հայաստանի եւ Արցախի անվտանգութիւնն ու տեղւոյն հայ բնակչութեան ապահովութիւնը: Սալպաշեան ըսաւ, որ հաւաքուած չենք սգալու մեր սուրբ նահատակները, այլ` վերանորոգելու մեր ուխտը հաւատարիմ եւ պահանջատէր մնալու մեր իրաւունքներուն: Ան եզրափակելով իր խօսքը կոչ ուղղեց համախմբուելու հայութեան ազգային նպատակներուն շուրջ, կառչած մնալու արմատներուն, տէր կանգնելու արդար դատին` հասնելու համար գերագոյն նպատակին` ազատ, անկախ եւ միացեալ Հայաստանին:

Մանրամասները՝ սկզբնաղբյուրում: