Սամվել Բաբայանի գործով քննչական գործողություններ են կատարվում. փաստաբան

Այս պահին ՀՀ ազգային անվտանգության ծառայությունում քննչական գործողություններ են կատարվում ԼՂՀ Պաշտպանության բանակի նախկին հրամանատար Սամվել Բաբայանի գործով. Yerkir.am-ին հայտնեց Բաբայանի պաշտպան Ավետիս Քալաշյանը (լուսանկարում)՝ նշելով, որ մանրամասներ կարող է հաղորդել ավելի ուշ:

Հիշեցնենք որ մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու փաստի առթիվ հարուցված քրեական գործի շրջանակներում ձերբակալվել է 3 անձ, այդ թվում՝ Սամվել Բաբայանը։

Ավելի վաղ ԱԱԾ-ն հայտնել էր, որ 2017թ. մարտ ամսին նախնական տեղեկություններ են ստացվել ՀՀ քաղաքացիների կողմից Վրաստանի Հանրապետությունից մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու մասին։ Ձեռնարկված քննչական գործողությունների և օպերատիվ-հետախուզական միջոցառումների արդյունքում հայտնաբերվել և առգրավվել է «Իգլա» տեսակի զենիթա-հրթիռային համալիրի արձակման խողովակ՝ «9M39» հրթիռով։

Դեպքի առթիվ 2017թ. մարտի 22-ին ՀՀ ազգային անվտանգության ծառայության քննչական վարչությունում ՀՀ քրեական օրենսգրքի 235-րդ 2-րդ մասի և 235.1-րդ հոդվածի 2-րդ մասի 1-ին կետի հատկանիշներով հարուցվել է քրեական գործ։ Նախաքննությունը շարունակվում է, միջոցներ են ձեռնարկվում զենքի (ռազմամթերքի) ապօրինի շրջանառությանն առնչություն ունեցած այլ անձանց հայտնաբերելու և գործի համար նշանակություն ունեցող մյուս հանգամանքները բացահայտելու ուղղությամբ։