Իրավապահների գործն է. Վահրամ Բաղդասարյանը՝ Ջրառատում հնչած կրակոցների մասին

Հայտնել ենք, որ Արմավիրի մարզի Ջրառատ գյուղում զինված միջադեպ է տեղի ունեցել, կան վիրավորներ:

Դեպքից հետո ՕՐՕ դաշինքը հանդես եկավ հայտարարությամբ, որում ասվում է. «Օհանյան-Րաֆֆի-Օսկանյան» նախընտրական շտաբի տեղեկություններով այսօր, Ջրառատ գյուղում «Հայաստանի Հանրապետական» կուսակցության (ՀՀԿ) տեղական կառույցի ներկայացուցիչները զինված հարձակում են գործել «Օհանյան-Րաֆֆի-Օսկանյան» դաշինքի համակիրների վրա, որի արդյունքում կան վիրավորներ»:

Yerkir.am-ը կապ հաստատեց ՀՀԿ Արմավիրի տարածքային կառույցի հետ՝ դեպքի վերաբերյալ տեղեկություններ ճշտելու: Այնտեղից, նախ, խիստ տարակուսած հետաքրքրվեցին՝ ով է զանգահարողը, թեև նախապես ներկայացել էինք, ապա կտրուկ պատասխանեցին, որ իրենք որևէ տեղեկություն չունեն, և անջատեցին հեռախոսը:

Զանգահարեցինք նաև Արմավիրի մարզպետ Աշոտ Ղահրամանյանին, ով ՀՀԿ Արմավիրի տարածքային կազմակերպության խորհրդի նախագահն է, սակայն նա չպատասխանեց մեր հեռախոսազանգերին:

ՀՀԿ խմբակցության պատգամավոր Առաքել Մովսիսյանը, ով Արմավիրի մարզից է, վստահեցրեց, որ ինքը ևս տեղեկություններ չունի միջադեպի մասին և այս պահին զբաղված է «ընտրություններով»:

Իսկ ՀՀԿ խմբակցության ղեկավար Վահրամ Բաղդասարյանը մեզ հետ զրույցում նախ ասաց, որ չի հասցրել տեղեկանալ՝ ինչ միջադեպ է տեղի ունեցել, ապա նշեց, որ դա իրավապահների գործն է, և նրանք պետք է պարզեն ամեն ինչ: