Գտնել օպերատիվ լուծումներ ենթակառուցվածքների խնդիրների վերաբերյալ. հանձնարարական

Այսօր կառավարության նիստում վարչապետ Կարեն Կարապետյանը նոր հանձնարարական տվեց ներդրումային ծրագրերի իրականացման արդյունավետության բարձրացման վերաբերյալ: Մասնավորապես, վարչապետի խոսքով, ներդրումային ծրագրերի իրականացման ընթացքում կառուցապատողները և առհասարակ գործարարները հաճախ բարձրացնում են էլեկտրաէներգիայի, գազի և ջրամատակարարման ընկերությունների հետ համակարգված համատեղ աշխատանքի անհրաժեշտության հարցը:

ՀՀ կառավարության ներդրումային ծրագրերի իրականացմանը և ներդրումներին աջակցելու նպատակով հանձնարարվեց ՀՀ էներգետիկ ենթակառուցվածքների և բնական պաշարների նախարարին` հնգօրյա ժամկետում առաջարկել «Գազպրոմ Արմենիա» ընկերությանը, ՀԷՑ-ին և «Վիոլա ջուր» ընկերություններին` նշանակել պատասխանատուներ, որոնք ՀՀ քաղաքաշինական պետական կոմիտեի և համայնքի ղեկավարների հետ կանոնավոր համատեղ աշխատանքի միջոցով կներկայացնեն օպերատիվ լուծումներ ենթակառուցվածքներին առնչվող հարցերի կապակցությամբ:

Հանձնարարվեց քաղաքաշինության պետական կոմիտեի նախագահին` հնգօրյա ժամկետում կնքված ներդրումային համաձայնագրերի պատճենները համապատասխան գրությամբ ուղարկել ընկերություններին և դրանց կողմից բարձրացված հարցերի քննարկմանը ներգրավել էներգետիկ ենթակառուցվածքներիբ և բնական պաշարների նախարարությանը: