Տաքսու վարորդի սպանության մեջ կասկածվող գյումրեցի երիտասարդին մեղադրանք առաջադրվեց

Փետրվարի 26-ին Արագածոտնի մարզի Թլիկ գյուղում 20-ամյա տաքսու վարորդին դանակի մի քանի հարվածներով սպանելու կասկածանքով ձերբակալված գյումրեցի Վ. Հովսեփյանին մեղադրանք է առաջադրվել ՀՀ ՔՕ 104-րդ հոդվածի 1-ին մասի՝ սպանության հատկանիշներով:

Yerkir.am-ին ՀՀ քննչական կոմիտեից հայտնեցին, որ քննիչը միջնորդություն է ներկայացրել դատարան՝ մեղադրյալի նկատմամբ, որպես խափանման միջոց, կալանավորումը կիրառելու համար:

Հիշեցնենք, որ փետրվարի 26-ին Արագածոտնի մարզի Թլիկ գյուղի վարչական տարածքում՝ գյուղամիջյան ճանապարհին, հայտնաբերվել է Երևան քաղաքի բնակիչ` 1997թ. ծնված Կ. Գրիգորյանի դիակը՝ մարմնի տարբեր շրջաններում կտրած-ծակած բազմաթիվ վնասվածքներով:

Դեպքի վայրի զննությամբ՝ Թլիկ գյուղ տանող ճանապարհի մոտ՝ դիակի հայտնաբերման վայրից 400 մետր հեռու, հայտնաբերվել է «Մերսեդես» մակնիշի ավտոմեքենա, իսկ մեքենայի կողքին՝ մեկ հատ դանակ:

Սպանությունը կատարելու կասկածանքով Թլիկ գյուղի մոտակայքից բերման է ենթարկվել, ապա՝ ձերբակալվել Գյումրի քաղաքի 24-ամյա բնակիչ։ Նա հրաժարվել է որպես կասկածյալ ցուցմունք տալ և ցանկություն է հայտնել հանրային պաշտպան ունենալ։ Կ. Գրիգորյանը ճանաչվել է տուժող: Քրեական գործով էական նշանակություն ունեցող մի շարք հանգամանքներ պարզելու նպատակով նշանակվել են դատաբժշկական փորձաքննություններ։

Հարցաքննվել են մի շարք անձինք, նրանց թվում՝ դեպքին ականատես վկա։