Լը Պենը հրաժարվել է Լիբանանի հոգևոր առաջնորդի հետ հանդիպումից՝ մերժելով գլխաշորով ներկայանալու պահանջը

Ֆրանսիայի նախագահության թեկնածու և «Ազգային ճակատի» առաջնորդ Մարին Լը Պենը հրաժարվել է Լիբանանի գերագույն հոգևոր առաջնորդի հետ հանդիպումից՝ մերժելով հանդիպմանը գլխաշորով ներկայանալու պահանջը:

«Դուք կարող եք իմ հարգանքի հավաստիացումները հաղորդել գերագույն մուֆտիին, սակայն, ես գլխաշոր չեմ կրի»,-հայտարարել է Լը Պենը, հայտնում է «Lenta.ru»-ն` հղում անելով «Reuters»-ին։ 

Կրոնական գործչի մամուլի ծառայությունը հայտնել է, որ ֆրանսիացի քաղաքական գործչի օգնականները նախապես իրազեկված էին հանդիպմանը գլխաշորով ներկայանալու անհրաժեշտության մասին:

Լը Պենը մի շարք հանդիպումներ է ունեցել Լիբանանում տեղի քաղաքական գործիչների հետ:

Ըստ հասարակական հարցման արդյունքների, Լե Պենը նախագահական մրցավազքի առաջատարն է՝ առաջին փուլում նրան կաորղ է սատարել ընտրողների 27 տոկոսը: Սակայն, երկրորդ փուլում, ըստ կանխատեսումների, Լը Պենը կպարտվի կամ Ֆրանսուա Ֆիյոնին կամ Էմանուել Մակրոնին: Ֆրանսիայի նախագահի ընտրությունները տեղի կունենան 2017-ի ապրիլ-մայիսին: