Համատեղ ենք աշխատել, լավ չի՝ ասել՝ մենք ենք արել. Բոստանջյանը՝ ավանդների վերադարձման ծրագրի մասին

«Ծառուկյան» դաշինքի համամասնական ցուցակի չորրորդ հորիզոնականը զբաղեցրած տնտեսագետ Վարդան Բոստանջյանի կարծիքով՝ իրենց քաղաքական ուժի շանսերը խորհրդարանական ընտրությունների շրջանակներում բավականին մեծ են:

«Մեր քաղաքական ուժի առաջնորդին իր գործերով հանրապետությունում ճանաչում են, լայն ճակատով գործունեություն է ծավալել, մեծ բարեգործություններ արել, իսկ քաղաքական առումով էլ ընդլայնված խումբ ենք, որը կարող է առավելություններ ենթադրել»,- այսօր լրագրողների հետ հանդիպմանն ասաց նա՝ հավելելով, որ հասարակությունն իր ընտրությունն անելիս պետք է ճիշտ գնահատի քաղաքական ուժերի ներկայացրած ծրագրերը, ինչպես նաև լիդերի գործոնը հաշվի առնի:

«Մենք կարող ենք ուժեղ զգալ, մեր առաջնորդն արտակարգ ծրագիր չի առաջարկում, այլ գործում է»,- հավելեց Բոստանջյանը:

Մասնագիտորեն գնահատելով ՀՎԿ-ի կողմից բարձրաձայնվող` ավանդների վերադարձին վերաբերող հարցերը՝ նա նախ նշեց, որ գաղափարը լավն է, բայց ծրագիրն ամբողջությամբ կյանքի կոչելու հարցն անիրատեսական է: «10 միլիարդ դոլարը գերազանցող ավանդներ մենք ի զորու չենք վերադարձնել: Ամբողջական վերադարձը բացառված է»,- ասաց տնտեսագետը՝ խոսքն ուղղելով «Հայկական վերածնունդ» կուսակցությանը. «Մենաշնորհ դարձնել, թե մենք ենք արել…. Մենք համատեղ ենք աշխատել: Լավ չի լինի վերցնել, ասել, որ մենք ենք արել»: