Նախաստորագրվել է նանոտեխնոլոգիաների ոլորտում հայ-իրանական երկկողմ համագործակցության փոխըմբռնման հուշագիր

Փետրվարի 11-ից 13-ը Իրանի նանոտեխնոլոգիական նախաձեռնությունների խորհրդի (Iran Nanotechnology Initiative Council) հրավերով տեղի է ունեցել ՀՀ տնտեսական զարգացման և ներդրումների նախարարի տեղակալ Էմիլ Տարասյանի գլխավորած պատվիրակության այցը Իրան:

Պատվիրակության կազմում էին ՀՀ կրթության և գիտության նախարարության գիտության պետական կոմիտեի գիտական քաղաքականության վարչության պետ պրոֆեսոր Արամ Սահարյանը և Հայ-Ռուսական (Սլավոնական) համալսարանի Մաթեմատիկայի և բարձր տեխնոլոգիաների ինստիտուտի տնօրեն ակադեմիկոս Էդուարդ Ղազարյանը:

Այցի հիմնական նպատակն էր ծանոթանալ Իրանի նանոտեխնոլոգիաների ոլորտի կառույցներին, դրանց հետազոտական և արտադրական գործունեությանը, ուսումնասիրել նանոտեխնոլոգիաների ոլորտում համագործակցության հնարավորությունները։ Հայաստանի պատվիրակությունն այցելել է Իրանի նանոտեխնոլոգիաների նախաձեռնությունների խորհրդի գրասենյակ, որտեղ հանդիպումներ են կայացել պրոֆեսորներ՝ խորհրդի միջազգային համագործակցության և նանոստանդարտացման հանձնաժողովների տնօրեն Ալի Բեիտոլլահի, խորհրդի գլխավոր քարտուղար Սաեեդ Սարկարի, խորհրդի արդյունաբերության և շուկայի զարգացման տնօրեն, Իրանի բարձր տեխնոլոգիաների լաբորատոր ցանցի տնօրեն Ռեզա Ասադիֆարդի հետ։ Վերջիններս ներկայացրել են ոլորտում իրականացվող հիմնարար և կիրառական հետազոտական գործունեությունը, ծանոթացրել խորհրդի կառուցվածքին, որոշումների ընդունման գործընթացին: Հատուկ շեշտադրվել է, որ Իրանում նանոտեխնոլոգիաների ոլորտը ճանաչված է տնտեսության զարգացման գերակա ուղղություն և երկիրը նանոգիտության բնագավառում մեծ հաջողությունների է հասել` ներկայում աշխարհում գրավելով առաջատար դիրքեր:

Կազմակերպվել է նաև այցելություն Միջին Արևելքի տարածաշրջանում լավագույններից մեկը ճանաչված Շարիֆի տեխնոլոգիաների համալսարանի նանոտեխնոլոգիական հետազոտությունների կենտրոն և համալսարանում աշակերտների համար ստեղծված նանոտեխնոլոգիաների լաբորատորիա: Շարիֆի համալսարանում կազմակերպվել են քննարկումներ պրոֆեսորներ Ազամ Իրաջիի, Ալի Մովաղարի, Մոհամմադ Մահդի Ահադիանի հետ:

Վերջիններս տեղեկացրել են, որ ակնկալում են հայկական կողմի առաջարկները նանոտեխնոլոգիական հետազոտությունների կոնկրետ ուղղություններով համագործակցություն ձևավորելու ուղղությամբ: Նախարարի տեղակալ Էմիլ Տարասյանի ղեկավարած պատվիրակությունն այցելել է Իրանի գիտության և տեխնոլոգիաների հետազոտական կազմակերպություն (Iranian Research Organization for Science and Technology, IROST), որն իրենից ներկայացնում է արդյունաբերական պարկ:

Այն հիմնադրվել է 1980 թվականին՝ Իրանի հետազոտողներին, գյուտարարներին և արդյունաբերողներին օժանդակելու նպատակով: Կազմակերպությունն արժեքավոր ծառայություններ է մատուցում երկրի գիտության, տեխնիկայի և ճարտարագիտության ոլորտներում` աջակցելով կիրառական և հիմնարար հետազոտությունների իրականացմանը, ինչպես նաև նոր տեխնոլոգիաների մշակմանը և դրանց առևտրայնացմանն ուղղված գործունեությանը` այնուհետև կազմակերպելով արտադրական նմուշների զանգվածային արտադրություն, այս բոլոր գործընթացներում ներգրավելով բարձր որակավորման մասնագետներ և ժամանակակից սարքավորումներ:

Այստեղ իրականացվող մի շարք նախագծեր ֆինանսավորվում են Նանոտեխնոլոգիաների խորհրդի կողմից: Նանոտեխնոլոգիաների ոլորտի պատասխանատուների հետ հանդիպումների արդյունքում, կողմերը նախաստորագրել են նանոտեխնոլոգիաների ոլորտում հայ-իրանական երկկողմ համագործակցության փոխըմբռնման հուշագիր: Առաջիկայում հուշագիրը կստորագրեն ՀՀ տնտեսական զարգացման և ներդրումների նախարարը և Իրանի նանոտեխնոլոգիական նախաձեռնությունների խորհրդի նախագահը։ Հուշագրի ստորագրումից հետո կմշակվի գործողությունների ծրագիր` հստակ ժամկետներով և ակնկալվող արդյունքներով:

ՀՀ տնտեսական զարգացման և ներդրումների նախարարություն