Գերմանիայի Կենտրոնական բանկն ավարտել է ոսկի վերադարձնելու գործընթացը

Գերմանիայի Կենտրոնական բանկն ավարտել է ԱՄՆ-ի և Ֆրանսիայի պահեստներում պահվող 678 տոննա ոսկին վերադարձնելու գործընթացը: Այս մասին հաղորդում է Die Welt-ը: 

Աղբյուրը մանրամասնում է, որ 2016 թվականին 111 տոննա ոսկի է վերադարձվել ԱՄՆ-ի Դաշնային պահուստային համակարգից, ևս 105 տոննա վերադարձվել է Փարիզից:

Կայքի հաղորդմամբ` 2013 թվականին Գերմանիան մեկնարկել է օտարերկրյա պահուստներից ոսկի վերադարձնելու գործընթացը: Ընդհանուր առմամբ ամերիկյան պահեստներում պահվելիս է եղել 300 տոննա ոսկի, իսկ ֆրանսիական պահեստներում` 378 տոննա ոսկի:

Նշվում է, որ Գերմանիայի ոսկու պաշարը կազմում է 3,378 տոննա և պահպանվում 269,813 ձույլի տեսքով: Այժմ Գերմանիայի ոսկու պաշարների 48 տոկոսը պահվում է Մայնի Ֆրանկֆուրտում: