Ի՞նչ փոխզիջում, երբ Ադրբեջանը ճանաչի Արցախի անկախությունը, էն ժամանակ կուսումնասիրենք. Սեյրան Սարոյանը՝ ՀԱԿ-ին

ՀԱԿ-ՀԺԿ դաշինքը նախընտրական պայքարի մեջ է մտնում` ԼՂ հակամարտության լուծման հստակ տարբերակ նշելով, այն է` փոխզիջում, որի այլընտրանքը մոտալուտ պատերազմն է:

ՀՀԿ խմբակցության պատգամավոր, գեներալ Սեյրան Սարոյանը, պատասխանելով Yerkir.am-ի հարցին, թե ինչպես է վերաբերվում ՀԱԿ-ի ծրագրային դրույթին, նշեց, որ դեմ է ՀԱԿ-ի առաջ քաշած լուծմանը:

«Պատերազմը ոչ մեկին պետք չի` ո'չ մեր ազգին, ո'չ էլ մեր էրեխեքին: Ոչ էլ թույլ կտանք, որ պատերազմ լինի: Աստված չանի, պատերազմ լինի, բայց եթե լինի, լիքը հողեր կան հլը Ադրբեջանում, դրանք էլ ձեռքներից կվերցնենք»,- ասաց Սեյրան Սարոյանը:

Հարցին, թե ՀՀԿ-ում ինչպես են պատկերացնում հարցի լուծումը, պատասխանեց. «Ի՞նչ փոխզիջում, ի՞նչ բան: Երբ որ Արցախի անկախությունն Ադրբեջանը ճանաչի, էն ժամանակ կնայենք, կուսումնասիրենք»:

Սեյրան Սարոյանի խոսքով` ՀԱԿ-ն այսօր ինչ ուզենա` կխոսի, որովհետև ընդդիմություն է:

Դիտարկմանը որ ՀԱԿ-ը հստակ լուծում է առաջարկում, եթե գա իշխանության, պատասխանեց. «ՀԱԿ-ը չի գա իշխանության, ՀՀԿ-ն ա լինելու իշխանություն»: Իսկ թե ինչո՞ւ է այդքան վստահ, որ ՀՀԿ-ն է մնալու իշխանության, նշեց. «Որովհետև ՀՀԿ-ն լավն ա»: Վերջում հավելեց. «Մի քիչ սպասեք, լավ ա լինելու, նոր վարչապետ ա եկել, լավ ա լինելու»: