ԻՊ-ը մեկնարկել է փախստական երեխաների հավաքագրումը

«Իսլամական պետություն» ահաբեկչական խմբավորման գրոհայինները մեկնարկել են փախստական երեխաներին իրենց շարքերում ներառելու աշխատանքները: Այս մասին հաղոդորում է The Independent-ը` հղում անելով ծայրահեղականությանը դիմակայություն ցուցաբերող Quilliam Foundation կազմակերպության զեկույցին:

Զեկույցում տրամադրված տվյալների համաձայն` դեռահասների հետ զրույցներում հավաքագրողները, որպես կանոն, շահարկում են ծանր պայմանները փախստականների ճամբարներում, և գումարներ ու սննդամթերք առաջարկում նրանց գրավելու համար:

Նշվում է, որ հավաքագրողներն ամենամեծ ակտիվությունը ցուցաբերում են Լիբանանում և Հորդանանում տեղակայված փախստականների ճամբարներում:

Զեկույցում ասվում է, որ ԻՊ գրոհայինները սերտ կապեր ունեն փախստականներին ապօրինի կերպով Եվրոպա տեղափոխող անձանց հետ, որոնց խմբավորումը վճարում է հավաքագրված երիտասարդներին տարբեր երկրներ տեղափոխելու համար: