Վարչական դատարանը հետ է ուղարկել Կապանի ԲԿ-ի նախկին տնօրենի հայցադիմումը

Կապանի ԲԿ-ի նախկին տնօրեն Սմբատ Օրբելյանը իրեն աշխատանքից ազատելուց հետո դիմել էր վարչական դատարան:
Yerkir.am-ին Սյունիքի մարզպետի մամուլի խոսնակ Վազգեն Սաղաթելյանը հայտնեց, որ այսօր վարչական դատարանը Սմբատ Օրբելյանի հայցադիմումը մերժել և հետ է ուղարկել:

Հիշեցնենք, որ ավելի վաղ Սյունիքի մարզպետ Վահե Հակոբյանը Yerkir.am-ի հետ զրույցում նշել էր, որ Օրբելյանին առաջարկվել էր դեմքը փրկելու համար դիմում գրել, սակայն նա հրաժարվել էր:  

Սաղաթելյանից հետաքրքրվեցինք` արդյո՞ք կապված է Կապանի և Գորիսի ԲԿ-ների տնօրենների` աշխատանքից ազատվելը, ինչին նա արձագանքեց. «Կապանինը մի քիչ այլ պատմություն է: Կապանում ստեղծվել էր հատուկ հանձնաժողով մարզպետի կողմից և այնտեղ հայտնաբերվել են կառավարական ու մասնագիտական խախտումներ, որոնք բերել էր նույնիսկ մահերի, և այդ պատճառով էլ առաջարկվել էր պարոն Օրբելյանին, որպեսզի նա դիմում գրեր, բայց նա չէր ցանկացել, իսկ մենք, ունենալով հանձնաժողովի արդյունքները, լուծարեցինք պայմանագիրը պարոն Օրբելյանի հետ»:

Սաղաթելյանից հետաքրքրվեցինք` Սաշիկ Խաչատրյանին է՞լ են դիմել, որպեսզի նա անձնական դիմումի հիման վրա ազատվի, որ չհայտնվի Սմբատ Օրբելյանի վիճակում, նա պատասխանեց, որ Կապանում այլ էր, և նման բան չկա:   

Նշենք, որ այսօր Գորիսի ԲԿ-ի տնօրենի պաշտոնից ազատվել է Սյունիքի նախկին մարզպետի հորեղբոր թոռը` Սաշիկ Խաչատրյանը: