«Օսկար»-ի առաջադրված իրանցի ռեժիսորը Թրամփի պատճառով չի կարողանա ԱՄՆ մեկնել

Ամերիկյան «Օսկար» կինոմրցանակաբաշխությանն առաջադրված իրանցի ռեժիսոր Ասղար Ֆարհադին չի կարողանա մեկնել Միացյալ Նահանգներ ու մասնակցել հեղինակավոր միջոցառմանը՝ ԱՄՆ նախագահ Դոնալդ Թրամփի սահմանած արգելքի պատճառով:

Ինչպես տեղեկացնում է The Independent-ը, օրերս 70-ամյա նախագահը ստորագրել էր մի շարք հրամանագրեր, որոնք միառժամանակ արգելում են Սիրիայից, Իրանից և ևս 4 մուսուլմանական պետությունից այցագրեր ունեցող քաղաքացիների մուտքն ԱՄՆ:

Արգելքը տարածվում է նաև անվանի կինոռեժիսորի վրա, որն Իրանի քաղաքացիություն ունի: Հայտնի է, որ նրա ֆիլմը՝ «Վաճառականը» (The Salesman) առաջադրված է «Լավագույն օտարերկրյա ֆիլմ» անվանակարգում:

Աղբյուրը մանրամասնում է, որ Թրամփը 4 ամսով արգելք է սահմանել բոլոր փախստականների՝ Միացյալ Նահանգներ մուտք գործելու իրավունքի վրա: Բացի այդ ժամանակավորապես դադարեցվել է Իրանի, Իրաքի, Լիբիայի, Սոմալիայի, Սուդանի և Եմենի քաղաքացիներին ԱՄՆ այցագրերի տրամադրումը: