Եթե վիրահատություններ չլինեն, առողջացում չի լինի. Արմեն Ամիրյանը 20 տոկոսով կրճատումներ կանի

Մշակույթի նախարարությունում մոտ 20 տոկոս կրճատումներ կլինեն: Այսօր տարվա ամփոփիչ ասուլիսում ասաց ՀՀ մշակույթի նախարար Արմեն Ամիրյանը:

Նա նշեց նաև, որ գրեթե բոլոր բաժիններում կլինեն կրճատումներ: «Համակարգը երբեմն ուռճացված է լինում: Բնական է` ժամանակի ընթացքում լինում են նման բաներ, և տեսնում ենք, որ աշխատակազմը մի փոքր ավելի է, քան պահանջվում է: Ցավով եմ ասում, որովհետև մարդկային ճակատագրերի հետ է կապված, բայց, միևնույն ժամանակ, եթե վիրահատություններ չլինեն, առողջացում չի լինի»,- ասաց Ամիրյանը:

Նա տեղեկացրեց նաև, որ նախարարությունն աուդիտ է անցկացնում իր բոլոր ՊՈԱԿ-ներում, և աուդիտի արդյունքներում նույնպես կլինեն կրճատումներ: