Խնայել կրթական համակարգը. ԿԳ նախարարի կոչը` քաղաքական գործիչներին

Ընտրություններից առաջ բոլոր քաղաքական ուժերին ՀՀ ԿԳ նախարար Լևոն Մկրտչյանը միշտ կոչ է արել խնայել կրթական համակարգը, քանի որ այն արդեն իսկ ներգրավված է ընտրությունների գործընթացում: Այսօր` տարվա ամփոփիչ ասուլիսի ժամանակ, նախարարը նշեց նաև, որ հիմա, երբ ընտրական գործընթացը պետք է էլեկտրոնային միջոցներով իրականացվի, կոնկրետ մարդիկ են պետք, որ կարողանան շարել, քաղաքացու անձնագիրը գրանցել:

«Հիմա գյուղում ո՞վ պետք է դա անի, եթե ոչ, օրինակ, ինֆորմատիկայի ուսուցիչը: Մասնագիտական իմաստով` այդ բազան արդեն կրթության վրա է: Յուրաքանչյուր կրթված մարդ, եթե ինքը քաղաքական ակտիվություն ունի և ուզում է քաղաքական դաշտի մեջ մտնել, պետք է ինչ-որ կուսակցության մեջ մտնի, քանի որ կուսակցությունների գաղափարական հենքն, ի վերջո, ապահովվում է կրթված մարդկանց միջոցով: Պահանջել, որ այդ մարդիկ ամբողջությամբ դառնան ապաքաղաքականացված` նշանակում է մեր երկրում քաղաքական մշակույթը ոչնչացնել»,- ասաց նախարարը:

Նա նշեց նաև, որ պետք է այնպես անել, որ կրթության ոլորտում աշխատող մարդիկ իրենց ծառայողական զենքերը չօգտագործեն իրենց գաղափարական ուղղությունն առաջ տանելու համար: