Վթարի հետևանքով զոհված ՊՆ անվտանգության աշխատակցին կհուղարկավորեն «Եռաբլուրում»

Դեկտեմբերի 8-ին Սյունիքի մարզում տեղի ունեցած ողբերգական վթարի հետևանքով մահացած պայմանագրային պաշտպանության նախարարի անվտանգության աշխատակից`կապիտան Ալեքսան Նվերի Սիմոնյանի հոգեհանգիստը տեղի կունենա այսօր՝ Մալաթիայի Սուրբ Մարիամ Աստվածածին եկեղեցում:

Yerkir.am-ի տեղեկություններով՝ նրան կհուղարկավորեն «Եռաբլուր» զինվորական պանթեոնում, իսկ վթարված մեքենայի վարորդին, լեյտենանտ Արմեն Վեսմիրի Մուսիկյանին՝ Ջրվեժում գտնվող գերեզմանատանը:

Նշենք, որ Ալեքսան Սիմոնյանը Արագածոտնի մարզի Մաստարա գյուղից էր, սակայն ընտանիքի հետ բնակվում էր Աբովյանում: Նա մանկահասակ երկվորյակ դուստրեր ուներ:

Սիմոնյանը ծառայել է ՊՆ հատուկ նշանակության զորքերում, այնուհետև ծառայության անցել պաշտպանության նախարարի անվտանգության ծառայությունում:

Ավելի վաղ հայտնել ենք, որ դեկտեմբերի 8-ին` ժամը 11.52-ի սահմաններում, ողբերգական վթար է տեղի ունեցել Սյունիքի մարզում: Վթարի արդյունքում շրջվել ու ձորն է գլորվել ՀՀ պաշտպանության նախարար Վիգեն Սարգսյանին սպասարկող` Lexus մակնիշի ՊՆ 0001 համարանիշով ծառայողական մեքենան: Վթարի օրը Վիգեն Սարգսյանը գտնվել է Սերժ Սարգսյանի հետ՝ ՀՀ հարավարևելյան սահմանագոտում գտնվող զորամասերից մեկում: