Կառավարությունը մինչև տարեվերջ կստեղծի ռազմավարական նախաձեռնությունների կենտրոն

Այսօր` կառավարության նիստից առաջ, վարչապետ Կարեն Կարապետյանը ներկայացրեց հերթական հանձնարարականները: Առաջին հանձնարարականը վերաբերում էր ռազմավարական նախաձեռնությունների կենտրոն ստեղծելուն:

Վարչապետն ընդգծեց, որ ռազմավարական կենտրոնի ստեղծումը նախատեսված է կառավարության ծրագրով: Կենտրոնը լինելու է կառավարությանը կից և գործելու է մասնավորի հետ գործընկերության ձևաչափով: Դրա հիմնական գործառույթն է լինելու երկարաժամկետ ռազմավարության  գերակա ուղղություններով երկարաժամկետ ռազմավարության ու փաթեթների մշակումը` մասնավոր հատվածի հետ սերտ համագործակցւթյան միջոցով:

«Տեղեկացնեմ, որ այդ հարթակն արդեն մի քանի անգամ օգտագործել ենք, եղել են բազմաթիվ քննարկումներ: Կենտրոնը կհիմնադրվի մինչև տարեվերջ»,- ասաց վարչապետը:

Նա նշեց, որ տարիների ընթացքում տարբեր մարմինների, միջազգային կառույցների կողմից մշակվել և կառավարության հավանությանն են արժանացել տարբեր ռազմավարություններ ու բարեփոխումների ծրագրեր: Այդ փաստաթղթերը ստացել են տարբեր անվանումներ՝ ռազմավարություն, հայեցակարգ, զարգացման ծրագիր, բարեփոխումների փաթեթ և այլն: Իրավական տեսանկյունից` գործող ռազմավարական փաթեթներում առկա են այնպիսիք, որոնց ուղղությամբ աշխատանքներ չեն տարվում: Քանի որ դրանք կարող են չհամապատասխանել ժամանակի պահանջներին կամ ռեսուրսներին, վարչապետը հանձնարարեց բոլոր գերատեսչություններին, նախարարություններին` մեկշաբաթյա ժամկետում ՀՀ կառավարության աշխատակազմին ներկայացնել այդպիսի ռազմավարություններն ու հայեցակարգերը, որպեսզի կենտրոնն ամփոփի դրանք: Հանձնարարվեց երեքշաբաթյա ժամկետում ներկայացնել այդ ռազմավարությունների համար պահանջվող ռեսուրսների վերաբերյալ տեղեկանք` համապատասխան հիմնավորումներով: